Kampen Makende
1. Kampen mar gwelo ji e chokruog-distrikt ma 2014 biro chakore karang’o?
1 Par ane ni ichano bedo gi gago moro makende gi osiepeni kod wedeni, to isetiyo gi thuolo malach kod pesa mang’eny e ike. Donge ibiro bedo gi ilo mathoth sama igwelo wendigo? E yo machalo kamano, nitie ikruok mang’eny ma osebedo ka dhi nyime e chano nyasi mar chiemb chuny ma ibiro miwa e chokruogewa ma 2014 mag distrikt kod chokruoge moriwo pinje. Kodong’ jumbe adek to chokruogwa mar distrikt chakore, wabiro bedo gi kampen makende mar gwelo ji. Ang’o ma biro konyowa bedo gi ilo sama wagwelo ji?
2. Ang’o ma biro jiwowa mondo watim duto ma wanyalo e gwelo ji e chokruoge ma birogo?
2 Ka waparo matut kuom ber ma wan wawegi wayudoga e chokruogewa madongo ma Jehova ikonwaga, wabiro timo duto ma wanyalo mondo wariw lwedo kampen mar gwelo jomamoko mondo ochopi. (Isa. 65:13, 14) Onego wang’e bende ni kampen ma kamago ma watimoga higa ka higa bedoga gi nyak. Wan gadier ni moko kuom joma wabiro gwelo biro chopo e chokruogno. To kata bed ni ji adi e ma obiro, gima wan-go gadier en ni kinda ma wabiro timo e kampenno biro kelo ne Jehova pak kendo biro nyiso maler ni waluwo ranyisi mare mar rwako welo.—Zab. 145:3, 7; Fwe. 22:17.
3. Ere kaka wabiro timo kampen?
3 Jodong-kanyakla e ma biro chano kaka ibiro tim kampenno e alworagi. Kuom ranyisi, gin e ma gibiro ng’ado kinde mowinjore wawe kalatese mag gwelo ji ne joma ok wayudo e utegi, kod kabe biro dwarore ni wachiwgi nyaka sama walendo e dukni, wang’yore, chirni, kod kuonde mamoko ma kamago. Sama wamiyo ji gasede e giko juma, onego wagwelgi bende ka nyalore. Kapo ni kinde kampen oriwo nyaka Ngeso mokwongo e dwe moro, gimaduong’ monego watim e Ngesono pod en mana kampen, to ok chako puonjruok mar Muma gi ji. Bang’ kampen, wabiro bedo mamor ahinya ng’eyo ni wasetiyo gi ilo, kendo wasegwelo ji mathoth kaka nyalore mondo gibi giriwre kodwa sama wachamo chiemb chuny ma Jehova oikonwa!