Gwelo Ji e Chokruok Maduong’ mar Ndalo Adek

1. Kampen mar gwelo ji e chokruok maduong’ mar ndalo adek biro chakore karang’o?

¹ Sama idwaro chano gago moro makende ne wedeni kata osiepeni, nyalo dwarore ni iti gi pesa kod thuoloni mang’eny e ike, kendo sama koro igwelogi e gagono, nyaka bedni ibiro bedo moil ahinya. E yo machalo kamano, osetim ikruok mang’eny mondo wayud chiemb chuny mogundho e chokruok mar ndalo adek ma biro. Jehova osemiyowa thuolo mar gwelo ji mondo obi e chokruogno kodong’ jumbe adek to watime. Ang’o ma biro konyowa gwelo ji gi siso e chokruogno?

2. Ang’o ma biro konyowa riwo lwedo kampen mar gwelo ji gi chunywa duto?

² Wabiro riwo lwedo kampenno gi chunywa duto ka waparo matut kuom ber ma wan wawegi waseyudo nikech puonj ma Jehova osebedo ka chiwonwa e chokruoge ma kamago mosekalo. (Isa. 65:13, 14) Bende, onego wang’e ni kampen ma watimoga higa ka higa bedoga gi nyak mathoth. (Ne sanduk ma wacho ni “Kampen Nigi Nyak.”) Moko kuom joma wabiro gwelo nobi e chokruogno, moko to ok nobi. Kata bed ni ji adi mwagelo ma nobi e chokruogno, kinda ma watimo e kinde kampen biro kelo ne Jehova pak kendo nyiso kaka en Nyasaye ma jachiwo.—Zab. 145:3, 7; Fwe. 22:17.

3. Ere kaka wabiro pogo kalatese mag gwelo ji?

³ Bura ka bura mar jodongo onego omany yore ma gibiro pogogo kalatesego ne ji mang’eny e alworagi, bende onego ging’ad kabe gibiro weyogi e udi ma weggi onge, kata ka gibiro pogogi kuonde ma ji mang’eny yudoree. E giko juma, onego ochiw gasede kaachiel gi kalatese mag gwelo ji, ka mano nyalore. Bang’ ka kampen oserumo, wabiro bedo mamor ahinya ng’eyo ni ne wagwelo ji e chokruok maduong’no gi siso, kendo ni ji mang’eny nochokore kodwa e chamo chiemb chuny mogundho ma Jehova noikonwa!

Kampen Nigi Nyak

Higni moko mosekalo, nyaminwa moro ne wuoro kabe kinda ma notimo sama nogwelo ji e chokruok mar ndalo adek ne dhi bedo gi nyak moro amora. Ne oparore kama, ‘Be joma wagwelogi nobi e chokruok adier?’ Ka ne en e chokruogno, chieng’ Ngeso gokinyi noneno dichwo moro ma nobet machiegni kode, nomose mopenje nyinge. Nyaminwano nofwenyo ni jalo nobiro e chokruogno nikech ne omiye kalatas ma ne igwelogo ji. Ne en gi penjo mogwaro kendo nyaminwano nodwoko penjogo. Ne onyiso nyaminwano kaka chokruogno ne mitne ndi! Kendo kaka rwakruok kod timbe mag joma ne nie chokruogno ne omore ahinya. Bang’e e odiechieng’no, nyaminwano nochako goyo mbaka gi dichwo moro gi jaode ma nobet bute. Joodno bende nogwel gi kalatas ma ne igwelogo ji, kendo ne giidho bas mondo omi gichop kama ne itimoe chokruogno. Ne gimor ahinya gi chokruogno, mi ne gichano mar duogo kendo kinyne chieng Jumapil. Nyaminwano nobiro mofwenyo ni kampen ma wajotimo higa ka higa bedoga gi nyak miwuoro.
E chokruok maduong’ mar ndalo adek ma nyocha otim, owadwa moro gi jaode ma gin jopainia mapile nomosore gi dichwo moro gi jaode ma hikgi oniang’ e chokruogno. Joodno nonyiso jopainiago ni e ka ne gihango biro e chokruogno. Jopainiago nopenjogi niya, “Ng’ano ma nogwelou?” Ne gidwoko kama, “Chieng’ moro ka ne wadok odwa, ne wayudo kalatas ma ne gwelowa e bwo dhoodwa.” Ne gisomo kalatasno, kendo pong’o kuonde mipong’o e tok kalatasno. Owete gi nyimine ma ne nie chokruogno nochiemo kaachiel kodgi e seche mag yueyo. Programno ne omoro joodno ahinya, kendo ne gichano mar duogo kinyne. Ne otim chenro mondo Joneno mag Jehova odhi olimgi bang’e.