Kampen ma Keloga Nyak

Ka odong’ jumbe adek to chokruog-distrikt chakore, jolendo biro timo kampen mar gwelo ji e chokruogno. Nitie gimomiyo itimoga kampenni higa ka higa. Joma ogwel mobiro e chokruogno bedoga mamor gi twege mabeyo mawuok e Muma. Moko kuomgi wuoroga ka gifwenyo ni joma tiyo e migepe mochan maber gin mana joma ochiwore. Moko to bedo mamor ahinya ka gineno kaka wadimbore kendo wan gi winjruok maber. (Zab. 110:3; 133:1; Isa. 65:13, 14) Kata kamano, be joma wagweloga e chokruogewa mag distrikt biroga? To nade e alwora ma joma ogwel nyaka chan wuoth mar seche mang’eny ka gidwa ni gichop e chokruogno?

Bang’ chokruog-distrikt ma higa 2011, ofiswa moro noyudo barua mowuok kuom miyo moro. Miyono noyudo ka osone kalatas mar gwelo ji e bwo dhoode. Ne ojaluchore kendo pondo sama Joneno mag Jehova olime. Nondiko kama: “Ne an gi ot ma jaber, dichwo malong’o, kendo naparo ni gik moko duto ma ne an-go noromo miya mor. Kata kamano, gima lit en ni pod ne aonge mor kendo ngimana ne chal ka nono. Omiyo, nang’ado mar chopo e chokruogno, ma ne itimo kilomita 320 ka ia kama adakie, mondo awinj program ma Ngeso.” Nikech chokruogno nomoro miyono ahinya, ne ogoyo ne chwore simo konyise ni odhi rito program ma Jumapil bende. Miyono nomedo lero kama: “Ne achiko ita ne twege duto ma nogol, ne aromo gi Joneno mag Jehova mang’eny, kendo ne ang’ado ni nyaka adhi nyime riwora kodgi kendo dhi nyime winjo twege ma kamago.” Bang’ a e chokruogno, nochako puonjore Muma, kendo bang’ dweche ang’wen kende nobedo jalendo ma pok obatisi. Nodhi nyime wacho kama: “Amor ahinya ni nanwang’o kalatasno e bwo dhooda nikech koro aseyudo mor madier!”

Moko kuom joma wabiro gwelo e chokruog-distrikt biro chopo e chokruogno. Omiyo, watimuru kampenni gi chunywa duto. Onego ukel kalatese modong’ sama ubiro e chokruog-distrikt mondo ugwel kodgi ji e thuolo moro amora moyudore.

[Sanduku e ite mar 4]

Kaka Wabiro Chiwo Kalatese mag Gwelo Ji

Mondo wagwel ji e alworawa duto, onego wawuo machuok. Wanyalo wacho kama: “Amosi. Wagwelo ji duto e chokruok moro ma wabiro bedogo ma bende itimo e piny mangima. Ma e kalatas ma wagweligo. Ibiro yudo weche momedore e iye.” Wuo gi ilo. Sama wagwelo ji e giko juma, wanyalo chiwo gasede bende kanyalore.