Ti Maber kod Bugewa
1. Ere kaka wanyalo luwo ranyisi mar Yesu mar tiyo maber gi gik ma Jehova chiwo?
1 Bang’ kane Yesu osemiyo oganda mang’ongo chiemo, ne ochano mondo chiemo modong’ okan maber. (Math. 14:19-21) Bedo ni Yesu ne ok otiyo marach gi gik ma ne Jehova ochiwo, ketonwa ranyisi maber mar ‘goyo erokamano’ kuom tiyo maber gi gigo duto ma Jehova chiwonwa kokalo kuom “jaritno mogen.”—Kol. 3:15; Luka 12:42; Math. 24:45-47.
2. En ang’o mwanyalo timo mondo kik wabed gi gasede mang’eny?
2 Gasede: Ka ok wami ji gasede e tij lendo, wanyalo dong’ gi gasede mang’eny. Ka kinde duto wayudo ka wan gi gasede mang’eny modong’, onego waduok piny kwan gasede ma wakawo. Wanyalo tiyo nade gi gasede machon? Weche manie gasedegi podi nyalo konyo ahinya jogo masomogi. Kapo ni wan kod gasede mang’eny machon, jarit tij lendo kata jaduong’ moro amora mar kanyakla nyalo konyowa mondo wayud yore mwanyalo chiwogo gasedegi.
3, 4. Gin weche mage monego waket e paro sama wakawo buge e Od Romo?
3 Buge Mamoko: Sama olok buk milendogo e dwe mondo oti gi machielo, non mokwongo kapo ni in kod bugni kapok imedo kawo moko e Od Romo. Ne ni ikawo mana buge maromi tiyogo e lendo kuom juma, kendo duogo kawo moko ka ma in-go oserumo.
4 Kuom buge ma in iwuon idwaro tiyogo, kaw ma ing’eyo ni oromi. Ndik nyingi e thuolo moket mar timo kamano ei bugno. Mano nyalo konyi yudo bugno kapo ni olal. Kapo ni itiyo gi Watchtower Library e CD-ROM kendo ijakano gasedeni misetiyogo, inyalo neno ni ok onego itim kwayo mar buge madongo moriw mag Mnara wa Mlinzi kod Amkeni!
5. En ang’o monego waket e paro sama wachiwo bugewa?
5 Chiwo Buge e Lendo: Watemo matek mondo wachiw bugewa mana ne jogo marwako wach gadier. Ng’e maber ni wan ema wan kod ting’ maduong’ mar siro tij goyo buge mabeyogi mwatiyogo e tij lendo kokalo kuom chiwo magwa. Sama imiyo ng’at morwako wach buk, kik iluor nyise thuolo ma en-go mar siro tij lendo mar piny mangima kuom golo chiwo ma en-go.
6. Ang’o momiyo wakawo bugewa kaka gik madongo ahinya, to kawogi kamano biro miyo wati kodgi nade?
6 Yesu ne omiyo ji chiemb ringruok e yor hono, to kata kamano, kinde mang’eny ne omiyo ji chiemo e yor puonjogi wach Nyasaye. Yesu ne owacho kama: “Dhano ok nobed mangima gi kuon kende, to gi weche duto mawuok e dho Nyasaye.” (Math. 4:4) Bugewa puonjo adiera mag Muma madwarore ahinya mondo omi ng’ato oyud ngima ma nyaka chieng’. (Joh. 17:3) Bugegi gin gik mabeyo ahinya ma ok onego watigo marach!