Ere Kaka Ibiro Dwoko?
1. Ang’o momiyo onego waluw ranyisi mar Yesu seche ma openjwa penjo moro?
1 Dhano pod wuoro nyaka chil kawuono yo molony ma Yesu ne dwoko godo penjo ma ne ipenje. Nyalo bedo maber ka waluwo ranyisi ma Yesu noketo e chiwo dwoko seche mwayudo penjo ka wan e tij lendo.—1 Pet. 2:21.
2. Ang’o manyalo konyowa chiwo dwoko e yo molony?
2 Chik Iti Mokwongo: Yesu ne kwongo paro gima omiyo ng’ato penjo penjo. Seche moko nyalo dwaro ni ipenj jal ma nigi penjono mondo ing’e gima oparo. Ng’at ma penjo ni, “Be iyie kuom Yesu?” nyalo bedo ni wuoro ahinya gimomiyo ok itim nyasi mar Krismas. Ka ing’eyo gima chando ng’ato gadier, inyalo dwoke e yo molony.—Luka 10:25-37.
3. Ang’o ma wan-go ma konyowa chiwo dwoko ma ji yie godo ma wuok e Ndiko?
3 Chiw Dwoko Kitiyo gi Wach Nyasaye: Kinde duto ber nyiso dwoko ma Muma chiwo kuom penjo. (2 Tim. 3:16, 17; Hib. 4:12) Buge mag Kutoa Sababu kod Thuond Weche Manie Muma Minyalo Wuoyoe, osebedo ka konyowa e chiwo dwoko mowinjore. Kata ka ng’at ma penjono ok oyie gi gima Muma wacho, inyalo tiyo gi rieko e wuoyo kode kuom gima Ndiko puonjo. Jiw jalno mondo opar matut kuom rieko manie Muma ma oseyudi ni tiyo maber. Kuom luwo ranyisi ma Yesu noketo, dwoko michiwo biro chalo gi “olembe mochwe gi dhahabu, ei adita mochwe gi fedha,” tiende ni manyiso luor kendo makonyo.—Nge. 25:11.
4. Gin kinde kaka mage ma ok owinjore temo dwoko penjo?
4 Be Onego Wadwok Penjo Duto? Kapo ni ok ing’eyo dwoko mar penjo moro, kik wiyi kuodi mar wacho ni: “Ok ang’eyo, kata kamano anyalo timo nonro kuom penjono kendo duogo gi dwoko ma ayudo.” Nyiso bolruok kendo dewo wuon ot e yo ma kamano nyalo miyo ogweli mondo ichak iduog. Ka ifwenyo ni joma kwedo wach ema penji penjo kendo ni gidwaro mana mino wach, luw ranyisi ma Yesu noketo mar chiwo dwoko e yo machuok. (Luka 20:1-8) E yo machalo kamano, ka ng’at ma ok oikore winjo adiera dwaro keti e mino wach, tiek wachno e yo mamuol kendo ti gi secheni e manyo joma oikore gadier mar winjo.—Math. 7:6.
5. Yesu noketo ranyisi mane kuom dwoko penjo?
5 Yesu nong’eyo ni geno kuom Jehova en gima duong’ e chopo migawone mar bedo “janeno kuom adiera,” kendo mano noriwo dwoko penjo mag joma ne dwaro yudo adiera. (Joh. 18:37) Mano kaka wan gi thuolo maber mar luwo ranyisi mar Yesu seche ma wachiwo dwoko ne jogo “duto ma chunygi noikore ne ngima mochwere.”—Tich 13:48, NW.