Ti gi Muma e Yo Molony
1. Ang’o momiyo tiyo gi Muma dwarore ahinya?
1 Tiyo e yo molony gi Wach mokudhi gi much Nyasaye konyowa lando kendo puonjo adiera e yo maler, bende okonyo e fwenyo puonj mag miriambo kod timbe ma dhano ema ochako.—2 Tim. 2:15; 1 Pet. 3:15.
2. Ang’o mabiro konyowa yudo ndiko e yo molony?
2 Med Ng’eyo Muma: Ka ng’ato tiyo gi gir tich moro pile, obedo molony e tiyo gi gino. Somo Muma duto ae chakruokne nyaka e giko miyo ing’eyo wach maduong’ ma Muma wuoyoe. Mano bende konyi paro ndiko kendo yudogi e yo mayot. Kaka imedo ng’eyo Ndiko, e kaka ibiro wuoyo gi kinda kendo ka in gadier kuom gima iwacho seche milendo ne jomoko e yo ma ok ichano kod seche ma in e tij lendo.—1 Thes. 1:5.
3, 4. (a) Gin yore mage mwanyalo medo ng’eyogo Muma? (b) Be isetiyo gi yore mamoko mondo imed ng’eyo Ndiko?
3 Bed ng’at mong’iyo gi elo Muma kendo luwo kama isomo e chokruoge mag kanyakla. Seche ma itimo puonjruok mari iwuon kendo iikori ne chokruoge mag kanyakla, som Ndiko moketi kendo ipar matut kaka ginyalo tiyo. Ji mang’eny yudo ni somo ndiko achiel kachiel ei Muma kar somogi e kompyuta kata somogi e kalatas miyo bedo negi mayot yudo ndikogo ka gin e tij lendo.—Joh. 14:26.
4 Joot moko osetimo chenro mar bedo gi kinde mag mako ndiko mag Muma mondo gipargi. Mano inyalo tim ka itiyo gi kad moko matindo ma nigi ndiko moketie, ma bathe komachielo nigi weche mag ndikogo. Gitiyo gi kalatesego ka giwilore mondo gine ka ginyalo wacho ndiko kata paro kama oyudore. Puonjruok kaka wanyalo lendo kod chiwo dwoko ka ng’ato kwedo wach ma walando kata dwoko penjo ka watiyo gi Muma bende miyo wamedo bedo molony.
5. Ang’o momiyo wadwaro medo lony marwa kuom Muma?
5 Onge buk minyalo pim gi Muma. Weche manie iye kende ema nyalo miyo ji “riekono ma kelo warruok.” (2 Tim. 3:15) Bedo ni ji mang’eny e alworawa ok ong’eyo mwandu mayudore e Muma, ber ka wamedo lony e nyisogi gik mabeyo manie Muma.—Nge. 2:1-5.