Be Imiyo Wach Nyasaye Duong’?

¹ E pinyni ma kinde mang’eny ji ok oyie kuom Muma, Jokristo madier to timo kinda e miyo Wach Nyasaye duong’. Nikech wayie ni ‘Ndiko duto owuok kuom much Nyasaye,’ wariwo Yesu Kristo lwedo, nikech nonyiso Jehova e lamo kama: “Wachni en adiera.” (2 Timo. 3:​16; Joha. 17:17) Ere kaka wanyalo miyo Wach Nyasaye duong’ e yo maber chuth?

² Puonjri Ndiko: Onge kiawa ni Yesu ne oketo chunye e puonjruok Wach Nyasaye. Timo mano ne okonye puonjo ji kotiyo gi Ndiko kinde duto ma ne otiyo tij lendo. (Luka 4:​16-​21; 24:​44-​46) Ere kaka wanyalo mako ndiko mang’eny e wiwa? Watimo kamano ka wasomo Muma pile ka pile, kae to waparo matut kuom ndiko ma wayudo ni jiwo chuny kata manyalo konyowa ahinya e tij lendo. E seche ma watimo ikruok ne chokruok, onego wael kendo wasom ndiko moketgo kaka ondikgi ei Muma, kendo kanyalore to waik paro ma wanyalo chiwo kuomgi. Sama wan e chokruok, onego wael Mumbewa mondo wasom ndiko kanyachiel gi jagol-twak. Puonjruok ndiko manie Muma biro ikowa mondo ‘wapuonj wach adiera kare.’​​—⁠2 Timo. 2:​15.

³ We Muma Ema Owuo: Ka wan e tij lendo, onego wawe Muma ema mondo owuo. Kuom ranyisi, kanyalore, onego watem somo kendo wuoyo e wi ndiko achiel gi wuon ot. Ka openjo penjo kata okwedo puonj moro, ber tiyo gi Muma e chiwo dwoko. Ka wuon ot odich, podi wanyalo chiwo paro moro mowuok ei Muma ka wawachone kama, “Ka podi ok adhi, we mondo anyisi paro manie ndiko moro kae.” Kanyalore, to somne Muma wuon, kimiye thuolo mar luwore kodi seche ma isomo ndikono.

⁴ Kane onyis wuon ot moro ndiko makwedo puonj mar Didek, ne owuoro mowacho kama, “Asebedo ka adhi e kanisa e ngimana duto, to kuom adier ok ne ang’eyo ni Muma wacho kamano!” Ne oyie puonjre Muma. Yesu nowacho ni rombege ne dhi winjo dwonde. (Joha. 10:​16, 27) Yo maber moloyo ma joma chunygi ni kare nyalo fwenyogo adiera en neno kisomonegi ei Muma wuon. Kuom mano, we mondo wabed joma miyo Wach Nyasaye moting’o adiera duong’!