Ti gi Weche Maywayo Ji Seche Mipuonjo
1. Tiyo kare gi Wach Nyasaye e tij lendo oriwo timo ang’o?
1 Jolendo molony, mana kaka jaote Paulo, ong’eyo maber ni ‘puonjo kare wachno mar adiera’ oriwo timo gik mang’eny moloyo mana somo achiel kachiel gima Ndiko Maler wacho. (2 Tim. 2:15) Ere kaka wanyalo puonjo ka watiyo gi weche ma ‘semo’ kata ywayo ji seche ma watiyo gi Wach Nyasaye?—Tich 28:23.
2. Ere kaka wanyalo konyo ji mondo omed chiwo luor ne Wach Nyasaye?
2 Nyis Gima Wach Nyasaye Wacho: Mokwongo, nyis jawinjo gima Muma wacho mondo one ni rieko manie iye owuok kuom Nyasaye. Adiera ma wan-go kuom Wach Nyasaye nyalo jiwo jawinjo mondo oket pache duto kuom ndiko mwasomo. (Hib. 4:12) Wanyalo wacho kama: “Aseyudo ni ber ng’eyo gima Nyasaye wacho e wi wachni. Ne ane gima Wach Nyasaye wacho.” Kanyalore, we mondo Wach Nyasaye ema owuo ka isome achiel kachiel.
3. Bang’ somo ndiko, en ang’o minyalo timo mondo ine ka jawinjoni owinjo tiende maler?
3 Mar ariyo, ler ndiko moa som. Ok yot mondo ng’eny ji owinj tiend ndiko seche mohang some. Dwarore ni kinde duto waler ndiko ka wanyiso kaka inyalo ti kode e wach miwuoyoe. (Luka 24:26, 27) Nyis thuond weche e ndiko musomo mondo osir gima uwuoyoe. Inyalo tiyo gi penjo mondo ine ka jawinjoni owinjo maler tiend ndikono.—Nge. 20:5; Tich 8:30.
4. Okang’ mane mogik madwarore ahinya mondo wapuonj e yo maywayo ji?
4 Jiw Weche Kitiyo gi Ndiko: Mar adek, tim kinda mondo imul chuny. Kony jawinjoni mondo one kaka ndikono mulo ngimane owuon. Jiwo weche kitiyo gi Ndiko nyalo miyo ng’ato olok paro ma en-go. (Tich 17:2-4; 19:8) Kuom ranyisi, bang’ somo Zaburi 83:18 wanyalo jiwo kaka ng’eyo nying ng’ato dwarore ahinya e bedo gi winjruok machiegni gi ng’atno. Kae to inyalo penjo kama, “Be iparo ni ng’eyo nying Nyasaye biro miyo ilem e yo modwaro?” Tudo ndiko gi ngima jawinjoni e yo machalo kama biro konye neno ber mar ndikono. Puonjo Wach Nyasaye e yo ma semo ji kamano biro ywayo joma chunygi muol mondo olam Jehova, Nyasaye madier.—Yer. 10:10.