Lend gi Paro mar Timo Mapiyo!
1. En jip mane ma Paulo nochiwo madwarore ni wanon e ndalowagi?
1 “Yal wach Nyasaye, kendo dhi mana kode nyime.” (2 Tim. 4:2) Ang’o momiyo jip ma Paulo nochiwono owinjore ahinya gi ndalowa? Ere kaka wechegi nyalo mulo ngimawa kod ngima joma moko?
2. Ang’o momiyo watimo kinda e manyo jogo mapok owinjo wach maber?
2 Ngima Ji ni Kama Rach: Ji mang’eny pok owinjo wach maber makelo warruok. (Rumi 10:13-15; 1 Tim. 4:16) Ji mathoth madwaro winjo wach mwalando pod yudore e alwora ma ilendoe nyadinwoya. Kapo ni walendo e odiechieng’ machielo kata e seche mopogore, wanyalo yudo ji mopogore opogore. Manyo ji gi kinda kamano biro miyo wabedo gi chuny maler kendo ma onge buch remo.—Tich 20:26.
3. Ere kaka wanyalo tiyo gi sechewa e yo maber ka wan e tij lendo?
3 Kata obedo ni ne giromo gi akwede mager, Jokristo mokwongo ‘nopong’o Jerusalem gi puonjgi.’ (Tich 5:28) Be waikore kaka Jokristogo mondo “wahul” wach maber chuth? (Tich 10:42) Ka wan e tij lendo, be watiyo gi sechewa e yo maber? Ka nitie gimomiyo onego warit jomoko modok timo limbe, be watiyo gi thuolono e lendo ne joma kalo?
4. Ere kaka lendo gi paro mar timo kamano mapiyo konyowa bedo ka warito?
4 Miyo Wamedo Bedo Motang’: Bedo ni giko mar pinyni okayo machiegni, nyaka wabed motang’ kendo wabed ka warito. (1 Thes. 5:1-6) Ka wasiko wawuoyo kuom geno ma wan-go kuom Pinyruoth, wabedo gi kinda mamiyo gik matimore e pinyni ok nyos chunywa. (Luka 21:34-36) Kaka wamedo ‘dwaro’ mondo chieng’no mar Jehova orure, e kaka wamedo kinda e tijwa mar lendo mareso ngima.—2 Pet. 3:11, 12.
5. Ere kaka nyiso luor ne ngima jiwowa e tij lendo?
5 Ka walendo gi paro mar timo kamano mapiyo, wanyiso yo ma Jehova nenogo ngima: “Onano kodu, kendo ok odwar mondo ng’ato otho, to mondo ji duto olok chunygi.” (2 Pet. 3:9; Ezek. 33:11) Mad wayier mar manyo ji mang’eny kaka nyalore e alworawa, mondo Jehova oyud pak!—Zab. 109:30.