Jiwo Ji e Yo Maber Mondo Gikaw Okang’

JODONG-KANYAKLA nyaka bed jogo manyalo “jiwo ji gi puonj mangima.” (Tito 1:9) Seche moko nyaka tim mano e bwo chal moko matek ahinya. Dwarore ni ng’ato ochiw puonj kaluwore gi yo ma Muma dwaro ni otimego. Omiyo dwarore ni jodong-kanyakla oluw puonjni: “Ket chunyi . . . kuom jiwo ji.” (1 Tim. 4:13, Luo New Testament, 2003) Kata obedo ni e sulani wawuoyo moloyo gi jodong-kanyakla kata jogo matiyo matek mondo oyud migawono, nitie kinde ma nyalo dwarore ni jonyuol koda jo matayo puonjruok mar Muma gi ji ojiw nyithindgi kata jopuonjre mag Muma okaw okang’. E chal ma kamago, puonj michiwo kaegi nyalo tiyo.

Chal Madwaro ni Otimie Mano. Mondo ing’e sama dwarore ni ichiwie jip, ber nono kuonde ma Muma nyiso kaka ne ojiw jomoko. Jaote Petro nojiwo jodong-kanyakla ni gikaw mapek ting’ momigi mar bedo jokwath mag kweth Nyasaye. (1 Pet. 5:1, 2) Paulo nonyiso Tito ni ojiw chwo marowere ‘obed moritore.’ (Tito 2:6) Paulo nojiwo Jokristo wetene ni giwach “gimoro achiel” kendo gitang’ gi jogo ma ne temo kelo pogruok e kind owete. (1 Kor. 1:10; Rumi 16:17; Fili. 4:2) Kata obedo ni Paulo nopuoyo jokanyo mar kanyakla ma Thessalonika nikech gik mabeyo ma ne gitimo, nojiwogi ni giti e yo momedore gi puonj ma ne giseyudo. (1 Thes. 4:1, 10) Petro nokwayo Jokristo wetene odhi nyime bedo mabor gi “gombo mag ringruok.” (1 Pet. 2:11) Juda nojiwo owetene ‘oked matek ne yie’ nikech joma ok noluoro Nyasaye ne nyalo temogi gidonj e anjawo. (Juda 3, 4) Jokristo duto ne onyis ni gijiwre ng’ato gi nyawadgi mondo richo kik wuondgi mi gibed gi chuny matek ta. (Hib. 3:13) Petro nojiwo Jo-Yahudi ma ne pok oketo yie kuom Yesu niya: “Resreuru kuom tieng’ni mobam.”—Tich 2:40.

Gin kido mage madwarore mondo ng’ato ochiw jip motegno e chal ma kamago? Ere kaka jalno machiwo jip nyalo timo kamano maok ochuno weche kata bedo mager?

“Kuom Hera.” Ka ok wajiwo ji “kuom hera,” jip mwachiwo nyalo wuok e yo mager. (File. 9) En adier ni sama jagol-twak dwaro ni ji okaw okang’ mapiyo, yo mowuoyogo onego onyis mano. Wuoyo gi dwol mayom yom nyalo winjore ka gima ng’ato ok ni gadier. Kata kamano, pod jipno onego owuog motegno kendo onyis kaka owinjo e chunye gadier. Chiwo jip e yor hera ema biro miyo jowinjo okaw okang’. Kowuoyo kuome owuon kendo e lo jowetene, Paulo nowacho ne Jo-Thessalonike niya: “Ung’eyo ni ne wabedo kod ng’ato ka ng’ato kuomu kaka wuoro bet gi nyithinde owuon, ne wajiwou.” (1Thes. 2:11, 12) Jodongo ma Jokristogo nojiwo owete gi hera. We hera madier ne jowinjo ema ota weche miwacho.

Wuo e yor rieko. Kik ichwany jogo mitemo jiwo mondo okaw okang’. To komachielo, kik iwe maok inyiso jowinjo “gik moko duto ma Nyasaye dwaro.” (Tich 20:27) Jowinjo mohero yudo puonj ok bi chwanyore kata weyo heri nikech ijiwogi mondo gitim gimakare.—Zab. 141:5.

Kinde mang’eny, kapok ijiwo ng’ato mondo okaw okang’, ber kikwongo ipuoye kuom wach moro sie. Par gik mabeyo ma oweteni timo—gik ma wang’eyo gadier ni Jehova morgo: yie ma ginyiso kuom tijegi, hera mamiyo gitimo kinda, koda nano margi e bwo chal moko matek. (1 Thes. 1:2-8; 2 Thes. 1:3-5) Mano biro miyo oweteni one ni igenogi kendo ing’eyo chal margi, kendo biro miyo gibed moikore rwako jip ma imiyogi.

Kuom Nano “gi Kinda Duto.” Onego wajiw ji ka wanano “gi kinda duto.” (2 Tim. 4:2, The Bible in Luo, 1976) Mano oriwo timo ang’o? Nano gi kinda oriwo horuok mos sama otimnwa marach kata ochwanywa. Jalno manano gi kinda siko ka geno ni jowinjo biro tiyo gi puonj mochiwo. Jiwo jowinjo gi chuny ma kamano miyo kik gipar ni ikawogi marach. Adiera ma in-go ni owete koda nyimineni dwaro tiyo ne Jehova gi nyalogi duto, miyo gibedo gi gombo mar timo gimakare.—Hib. 6:9.

Kuom Tiyo “gi Puonj Mangima.” Ere kaka jaduong’-kanyakla nyalo chiwo jip kotiyo “gi puonj mangima”? Kuom “makore motegno gi wachno maradier e lony mare mar puonjo.” (Tito 1:9, New World Translation) Kar wacho mana pachi, ket Wach Nyasaye ema ojiw wecheni. We Muma ema okonyi ng’eyo gima onego iwach. Nyis achiel kachiel kaka tiyo gi puonj mag Muma kuom wach muwuoyoe konyo. Ng’e maler chandruok mabedoe—gie sani koda e kinde mabiro—ka ng’ato ok luw Wach Nyasaye, kendo ti gi wechego mondo inyis jowinjo gimomiyo dwarore ni gikaw okang’ mowinjore.

Ne ni ilero maber ne jowinjo gima dwarore ni gitim koda kaka ginyalo timo kamano. Ket maler ni weche miwacho ogurore chuth e Ndiko. Kapo ni Ndiko chiwo thuolo ne ng’ato mondo oti gi pache owuon e ng’ado wach moro, nyis tong’ maok onego okal. Kae to, e weche mitiekogo, jiwgi mogik e yo mamiyo gibedo gi gombo motegno mar kawo okang’.

Gi “Chir mar Yalo Wach.” Mondo ng’ato ojiw ji e yo maber, dwarore ni obed gi “chir mar yalo wach yie.” (1 Tim. 3:13) Ang’o makonyo ng’ato owuo gi chir? Onyalo wuoyo gi chir ka en owuon oketo ranyisi e “tim mabeyo duto” maluwore gi gima ojiwo owetene mondo otim. (Tito 2:6, 7; 1 Pet. 5:3) Ka oketo ranyisi maber, jogo mojiwo mondo okaw okang’ biro neno ni ok onyisgi ni gitim gima en owuon ok otim. Gibiro neno ni ginyalo luwo ranyisi moketo e nyiso yie mana kaka en bende otemo luwo ranyisi mar Kristo.—1 Kor. 11:1; Fili. 3:17.

Jip motenore kuom Wach Nyasaye kendo mochiw gi chuny mar hera nyalo konyo ahinya. Jogo momi migawo mar chiwo jip ma kamano, onego otim kinda mondo gichiw jipno e yo maber.—Rumi 12:8.