Pogo Kendo Rito Sa Kaka Dwarore

KATA obedo ni puonjo mong’ith ema onego wami pek moloyo, rito sa e twak bende dwarore. Chokruogewa ochan mondo ochakre kendo orum e seche moket sie. Mondo wachop mano, dwarore ni ng’ato ka ng’ato ma nigi migawo e program orit sa.

Kaka ji kawo ngima kuonde mathoth e kindegi opogore gi kaka ne ikawe e kinde Muma. Kindego ji ne ok dimb sa e wang’e, to ne gitiyo gi weche kaka “kar sa adek” kata “kar sa apar.” (Math. 20:3-6; Joh. 1:39) Ji ok ne dew ahinya rito sa e wang’e e yoregi mapile. Kuonde moko e piny ji pod kawo sa kamano.

Kata kamano, bed ni oganda ma ng’ato wuokie ok rit sa kata en owuon ema ok odew, puonjruok rito sa kaka dwarore nyalo konyowa. Kapo ni ji mogwaro nigi migawo e program, dwarore ni ging’e kinde moyang ne moro ka moro kuom migepego. Puonj mawacho ni “weche duto mondo otimre maber kendo makare” inyalo tigo kuom wach rito sa sama watimo migepe mag chokruogewa.—1 Kor. 14:40.

Rito Sa e Wang’e. Ikruok e gima duong’. Thothne, jogol-twak mayudo ka rito sa teknegi, yudo pekno nikech ok gitimo ikruok maber. Nyalo bedo ni giketo geno ahinya kuom nyalogi. Kata nyalo bedo ni girito nyaka dakika mogik eka koro gitimo ikruok. Rito sa chakore gi kawo migawo mari gi pek kendo yie timo ikruok maber.

Be migawo mari en mar somo? Mokwongo, kal kendo e Lony mar 4 nyaka 7, mawuoyo kuom wuoyo malolore, ling’ matin, jiwo tiend weche, kod jiwo puonj madongo. Kae to, ti gi lonygo sama isomo weche mag twak gi dwol. Kwan ni itiyo gi dakika adi. Be dwarore ni isom piyo mondo itiek migawo mari e wang’ sa? Som piyo piyo kuonde maonge puonj madongo, kata kamano mondo ijiw puonj madongo, ling’ matin kuonde mowinjore kendo dhi mos. Tiegri nyadinwoya. Kaka imedo somo e yo malolore, e kaka ibiro yudo ka yot chano kendo rito sa.

Be ibiro tiyo gi weche mondiki? Ok ochuno ni indik weche mang’eny ahinya ka gima en twak misomo ni eka irit sa. Sama ne itiegori e Lony mar 25, ne ipuonjori yo maber mar ndiko weche machuok matayi. Ket e pachi weche abichgi: (1) Ik weche mabeyo, to kik gibed mang’eny ahinya. (2) Ket puonj madongo e pachi, to kik imak weche mag sentens e wiyi. (3) E kalatas moting’o weche matayo twak, ndik dakike mibiro tiyogo e lero puonj madongo kata nyis kama onego bed ni isechope bang’ dakike moko. (4) Sama itimo ikruok, ng’e weche matindo tindo minyalo weyo kapo ni iyudo ni sa yombi. (5) Tiegri kaka ibiro golo twagi.

Tiegruok en gima dwarore ahinya. Sama itiegori, non ni itiyo gi kinde maromo nade e lero wiye matindo mag twak. Kal e twagi nyadinwoya nyaka chop kama inyalo gole gi dakika momiyi. Kik item soyo weche mang’eny ahinya. Ket dakika moko tenge sama iikori nikech sama igolo twak e nyim ji, inyalo tiyo gi dakika mang’eny moloyo mitiyogo sama itiegori kar kendi.

Pogo Sa e Twak. Rito sa otudore ahinya gi kaka ng’ato pogo sa e twak. Weche mayudore e twak ema onego okaw dakika mang’eny moloyo. Kanyo e kama puonj madongo yudoree. Weche michakogo twak onego obed maromo timo gik moko adek mowuo kuomgi e Lony mar 38. Weche manie i twak ok onego obed mang’eny ahinya mamoni yudo thuolo moromo mar tieko twak e yo maber kaluwore gi Lony mar 39.

Kinda mari mar rito sa biro miyo twagi owuog maber, kendo nyiso luor ne jogol-twak mamoko manie program koda ne kanyakla duto.