Iko Twege Migolo ne Kanyakla

PROGRAM mar Skul mar Tij Nyasaye oiki mondo okony kanyakla mangima. Puonj mabeyo bende ichiwo e chokruoge mamoko mag kanyakla, mag alwora kod mag distrikt. Kapo ni omiyi migawo e achiel kuom chokruogegi, ng’e ni in gi ting’ maduong’. Jaote Paulo nojiwo Timotheo ma ne en jaduong’ kanyakla, mondo otim kinda kinde duto orit yo mopuonjogo. (1 Tim. 4:16) Jogo mabiro e chokruoge mag kanyakla Jokristo, osewalo thuologi—kendo moko kuomgi osetimo kinda ahinya—mondo gibed e chokruok mipuonjogie weche majiwo winjruokgi gi Nyasaye. Migawo mar chiwo puonj ma kamano en migawo makende adier! Inyalo timo ang’o mondo ichop migawo momiyino e yo maber?

Jiwo Puonj Mayudore e Somo mar Muma

Ma en migawo mawuok e somo mar Muma mochan ne jumano. Onego ojiw kaka wechego mulo ngimawa e kindegi. Mana kaka ondiki e Nehemia 8:8, Ezra gi jowetene ne somo Wach Nyasaye e nyim ji, ka gilero kendo “ginyiso tiende,” mondo ji ong’e wechego maber. Migawo mari mar jiwo puonj e somo mar Muma miyi thuolo mar timo kamano in bende.

Onego iik migawo machalo kamano nade? Kanyalore, som kama oyangi misomo e Muma chon kapod odong’ juma achiel kata moloyo kanyo. Kae to par chal mar jokanyaklau koda kaka dwarore ni okonygi. Ket wachno e lamo. Gin puonj mage kata ranyisi mage mayudore e Wach Nyasaye kama oyangino, manyalo konyogi?

Timo nonro dwarore. Be Watchtower Library momak e CD-ROM kata Fahirisi yudore e dhok miwacho? Ka en kamano, ti kodgi. Kuom timo nonro e buge mosego kuom Ndiko miseyiero lero tiendgi, inyalo yudo weche manyiso chal ma ne nitie, kaka weche mokor chopo, gima ndiko moko wacho kuom Jehova, kata weche malero puonj moko. Kik item lero weche mang’eny ahinya. Yier mana ndiko manok mibiro jiwo. Ber moloyo kilero ndiko matin, to ilergi maber.

Migawono nyalo dwaro ni ikwa jowinjo mondo gin bende gichiw paro kuom gima gisepuonjore e somo mar Muma mar jumano. En ang’o ma ne giyudo manyalo konyogi e puonjruok margi giwegi koda e puonjruok mar joot, kata manyalo konyogi e tijgi mar lendo kata e ngimagi mapile? Ne gin kido mage ma Jehova nonyiso kaluwore gi kaka notimo ne ji koda ne pinje? Jowinjo ne opuonjore ang’o ma ne ojiwo yiegi, kendo omiyo gimedo hero Jehova ahinya? Kik ikaw kinde mang’eny kitemo lero weche ma korgi tek. Jiw tiend weche miyiero, kendo nyis kaka ginyalo tiyo.

Chokruok mar Tijwa

Sama igolo twak mawuok e Tijwa mar Pinyruoth, dwarore ni inyis jowinjo weche duto mayudore kanyo. Kony jowinjo mondo ging’e kaka Ndiko mochiw siro gima ipuonjono. (Tito 1:9) Thothne, kinde jabedo matin, omiyo thuolo mar medo weche mamoko bedo maonge.

To seche moko, inyalo miyi migawo ma wechene ok yudre e Tijwa mar Pinyruoth. Inyalo ori kama weche yudore e Ohinga mar Jarito, kata inyalo miyi weche machuok matayo migawono. Kaka japuonj, in ema onego inon chal mar kanyakla mondo ine kaka wechego nyalo konyogi. Nyalo dwarore ni iti kod ranyisi machuok kata wach moro mosene madonjo maber gi weche ma uwuoyoe. Ng’e ni migawo mari ok en mana wuoyo e wi wich momiyi, to onego itim migawono e yo makonyo kanyakla ochop tich ma Wach Nyasaye dwaro ni gitim kendo giyud mor e timo kamano.—Tich 20:20, 21.

Sama iiko migawo mari, par chal mar joma nie kanyakla. Pwogi kuom gik ma gitimo gie sano. Tiyo gi weche monyisgigo nyalo konyogi nade mondo gimed yudo nyak maber koda mor e tijgi mar lendo?

Be migawo mari dwaro ni otim ranyisi kata ipenj ng’ato penjo? Ka kamano, onego itim chenro chon. Yot kwayo ng’at machielo mondo ochanni ranyisigo, kata kamano kinde mang’eny timo kamano ok mi giwuog kaka dwarore. Kanyalore, kapok chieng’ chokruok ochopo, tiegreuru kaka ubiro timo ranyisino kata kaka ibiro penjo ng’ato penjo. Ne ni otim kuonde ma kamago e migawo momiyi e yo majiwo adier puonj michiwo.

Chokruoge mag Alwora kod mag Distrikt

Owete mosenyago kido mabeyo ma gibedo jogol twak kendo jopuonj molony, nyalo yudo migawo e program mag chokruoge mag alwora koda mag distrikt. Kuom adier, magi gin thuolo makende mag puonjo Wach Nyasaye. Migawono nyalo bedo kalatas mar twak misomo achiel kachiel, kata kalatas momiyi moting’o weche matayi e golo twak, onyalo bedo weche matayo drama mar Muma ma nigi puonj matiyo e kindewagi, kata paragraf manyiso kaka onego otim gimoro. Kapo ni iyudo migawo moro e program machalo kamano, som adimba weche duto momiyi. Non-gi maber ma ing’e kaka ginyalo konyo jowinjo.

Kuom jogo ma omi twak misomo achiel kachiel, onego gisom wechego duto mana kaka ondikgi. Ok onego gilok kata chano wechego e yo machielo. Gipuonjore wechego mondo ging’e maler puonj madongo mantie koda kaka igero puonjgo. Gitiegore somo wechego gi dwol ma nyaka ging’e jiwo tiend weche kare, wuoyo gi ilo, wuoyo gi mor, gi chuny madwarore ne weche miwacho, wuoyo gi jing’o, ka gin gadier gi wechego, kendo wuoyo gi dwol mawinjore kendo mochwiny madwarore e nyim oganda maduong’.

Owete mimiyo kalatas moting’o weche matayo twak nigi ting’ mar gero wechegi mondo omakre machiegni gi weche manie kalatasno. Kar somo asoma weche manie kalatasno kata ndiko wechene duto mondo obi osomgi kaka gin sama ogolo twak, jagol-twak onego ogol twagno maok ong’i ahinya weche mondik kendo owuo kowuok e chunye. Dwarore ni iti gi dakike kaka oketni e kalatas mar twak, mondo iket maler moro ka moro kuom puonj monyis. Jagol-twak onego oti maber gi weche kod Ndiko mochan e bwo puonj madongo. Ok onego omed puonj moko ma en ema ohero mamiyo oweyo oko weche manie kalatas momiye mar twak. Onge kiawa ni Wach Nyasaye e mise mar puonj. Ting’ mar jodong-kanyakla en ‘yalo Wach Nyasaye.’ (2 Tim. 4:1, 2) Omiyo jagol-twak onego onon ahinya Ndiko mantie e kalatas momiye moting’o weche matayo twak—kolero kor ndikogo kendo nyiso kaka inyalo ti kodgi.

Chak Timo Ikruok Chon

Ei kanyakla ma intie, be nitie thuolo mag yudo migepe mang’eny? Inyalo timo ang’o mondo itim ikruok ne migepeni duto e yo maber? Kik ibed ng’ama iko migepene e dakika mogik.

Mondo twege okony kanyakla gadier, dwarore ni opar kuomgi matut kuom kinde malach. Omiyo, bed gi tim mar somo mapiyo weche manie migawo moro amora momiyi bang’ yudogo. Mano biro miyi kinde mar paro weche mag twagno mos mos sama idhi nyime gi tijeni mamoko. Kuom odiechienge kata jumbe modong’ kapok igolo twagno, inyalo winjo weche manyalo konyi bero twagi mondo okony ji. Gik moko nyalo timore manyiso kaka twagino owinjore gie kindeno. Somo kendo paro migawo ma in-go mapiyo bang’ yude kawo kinde, kata kamano mago gin kinde makelo nyak maber. Sama koro ibetne piny mondo iike maber, ibiro yudo nyak nikech ne iparo matut kuome chon. Kitimo kamano sama iiko migepeni, mano biro resi kik ibed gi kibaji mang’eny, kendo biro konyi golo twak e yo maber makonyo ji kendo chopo e chuny joma nie kanyakla.

Okang’ migenogo mich ma Jehova osemiyi mar bedo e program mar puonjo joge, biro miyo imiye duong’ kendo mano biro bedo gweth ne jogo mohere.—Isa. 54:13; Rumi 12:6-8.