Be In gi Wang’ Mangima?
1. Tiend bedo gi ‘wang’ mangima’ en ang’o?
1 Gik ma watimo luwore gi kama waketoe wang’wa ahinya. Mano kaka weche ma Yesu nowachogi owinjore: “Ka wang’i ngima, ringri duto nobed gi ler”! (Math. 6:22) Ka wang’wa “ngima” korka wach Nyasaye, ong’iyo mana gimoro achiel, tiende ni timo dwaro mar Nyasaye. Waketo Pinyruodh Nyasaye bedo motelo kendo pachwa ok galre e manyo gik ringruok kata timo gik manyalo monowa lendo.
2. Ang’o manyalo miyo yo ma wanenogo gik moko olokre?
2 Onego Wanonre Wawegi: Wanyalo chako neno gik moko e yo mopogore kapo ni gik mitiyogo e lando weche lando gik manyien ma iwachonwa ni gin mochuno. Kapok ng’ato ochako timo gimoro kata nyiewo gimoro mabiro kawo sechene, pesa kata teko mang’eny, nyalo bedo maber mondo “okwan nengo” ka openjore owuon kama, ‘Be gima adwaro timoni biro miyo ati ne Jehova e yo maberie moloyo?’ (Luka 14:28; Fili. 1:9-11) Bende nyalo bedo gima nyiso rieko ka kinde ka kinde wanono kaka wanyalo medo keto ngimawa obed mayot mondo wamed bedo gi thuolo e tij lendo.—2 Kor. 13:5; Efe. 5:10.
3. Ang’o ma wapuonjore kuom nyaminwa moro ma notimo lokruok ma ngimane obedo mayot?
3 E kinde ma nyaminwa moro nochako bedo painia mapile, noneno ni onge rach ka odhi nyime gi tije mar yuto makawo thuolone ahinya kar timo mana tich makawo kinde matin to miyo oyudo gik ringruok mochuno. Bang’e nowacho kama: “Onge ng’ato manyalo tiyo ne ruodhi ariyo. Ne chuna weyo luwo gik ma ne adwaro mana bedogo, to amany mana gik mochuno. Nafwenyo ni gik ringruok ti kendo temo manyogi ahinya ne dhi mana ola kayiem.” Chal mar ngimane ne oyiene timo lokruok mondo odag e ngima mayot, noweyo tich ma noyudo otiyo ma ochako tiyo tich machielo, kendo noyudo thuolo mar dhi nyime ka en painia.
4. Ang’o momiyo dwarore ahinya ni wasik ka wan gi wang’ mangima e kindegi?
4 Bedo ni onego otim gik moko mapiyo e kinde mwadakieni, dwarore ahinya ni wabed gi wang’ mangima. Odiechieng’ kodiechieng’ wamedo sudo machiegni gi giko mar piny marachni kendo bedo machiegni gi chakruok mar piny manyien mar Nyasaye. (1 Kor. 7:29, 31) Ka waketo pachwa e tij lendo, wanyalo resre wawegi kendo reso jogo ma winjowa.—1 Tim. 4:16.