Be Inyalo Lendo ne Jaod Janeno Wadwa?
1. Ang’o momiyo ok Jokristo kende manie ot mopogore e yie ema gombo konyo jaodgi maok janeno mondo ong’e adiera?
1 Be un gi jolendo e kanyaklau ma joma gin-go e kend ok gin joneno? Ka en kamano, onge kiawa ni jolendogi gombo ni joma gin-go e kend oriwre kodgi e lamo madier. To ok gin kendgi. Ji duto e kanyakla nigi gombo ma Nyasaye nigo ni “ji duto okwo, kendo ging’e adiera chuth.” (1 Tim. 2:4) Ere kaka wanyalo lendo ne jal ma jaode en janeno e kanyaklawa?
2. Ere kaka neno gik moko e yo matut biro miyo wakony jal ma jaode en janeno?
2 Mokwongo, onego watem neno gik moko kaka jaot maok janenono nenogi. Nyalo bedo ni jal maok en janeno ohero joode kendo otemo matek mondo obed jaot kata janyuol maber. Samoro yiene mogeno ahinya ema opogore gi marwa. Nyalo bedo ni gik mong’eyo kuom Joneno mag Jehova gin mana ma osiepene ma nigi paro maok kare kuom joneno osenyise. Jomoko to winjo marach nikech thuolo ma ne gitiyogo kanyakla kaka joot koro jaodgino tiyogo e weche mag lamo. Neno gik moko e yo matut kata tiyo gi rieko biro konyowa timo timbe mang’won kendo chiwo luor ne jalo kendo biro miyo wabed gi chir seche ma wan kode.—Nge. 16:20-23.
3. En yo mane maber ahinya mwanyalo lendogo ne jaod janeno wadwa?
3 Dewgi Gadier: Yo maberie moloyo mwanyalo kwongo landogo adiera ne jaod janeno nyalo bedo timbewa mabeyo, to ok kwongo somone Muma. (1 Pet. 3:1, 2) Gima dwarore ahinya en dewogi gadier. Nyimine e kanyakla nyalo dewo gadier jaod owadwa, to owete nyalo timo kamano ne jaod nyaminwa. E yo mane?
4. Ere kaka wanyalo dewo gadier jaod janeno wadwa?
4 Kapok iromo gi jal maok janenono, inyalo chano mar romo kode bang’ wuoyo gi jaode ma Jakristo. Kik ine marach kapo ni jalo ok orwaki e yo maber kaka ne iparo. Dewe gadier nyalo miyo obed gi paro maber kuom Joneno mag Jehova. (Rumi 12:20) Jokristo moko motegno e yie osegwelo jal maok janeno kaachiel gi joode ma Jokristo e migago mondo ging’ere kode kendo tieko paro maok kare manyalo bedo ni en-go. Gisewuoyo kode kuom gik mamore kar chune mondo giwuo kuom weche mag Muma. Bang’e ka koro jalo ni thuolo kodgi, ginyalo chako wuoyo e wi Ndiko. Onyalo yie biro e achiel kuom chokruogewa kapo ni ogwele mondo obi owinj gima jaode puonjorega, to moloyo ka koro oseng’eyo jomamoko e kanyakla. Kata kapo ni podi ok oikore ng’eyo adiera, inyalo puoye kuom kaka oriwo lwedo jaode ma janeno.
5. Ere kaka jodongo nyalo lendo ne jaod janeno wadwa?
5 Jodong-kanyakla onego otem matek olend ne jogo kendo tiyo gi thuolo moro amora e lendonegi. Jal maok janeno mosebedo ka ok dwar puonjore Muma nyalo yie winjo jip mawuok e Ndiko seche ma en e osiptal kata seche mokalo e chandruoge mag tuoche. Kapo ni joot mopogore e yie kadho e chandruok moro kaka tho mar achiel kuom joodno, jodongo nyalo timo chenro mondo jal maok janenono obedie e seche ma gihoyo joodno.
6. Ang’o momiyo dwarore ni walend ne jaod janeno wadwa?
6 Par ane mor ma Jakristo e kanyaklawa biro yudo kapo ni jaode orwako adiera mobedo janeno! Jehova, malaike kaachiel gi jomamoko e kanyakla bende biro bedo mamor. (Luka 15:7, 10) Kata kamano, kapo ni watemo to jalo ok orwako adiera, wanyalo bedo mamor nikech kinda mwatimo moro Jehova nimar “ok odwar mondo ng’ato otho, to mondo ji duto olok chunygi.”—2 Pet. 3:9.
[Blurb manie ite mar 6]
Yo maberie moloyo mwanyalo kwongo landogo adiera ne jaod janeno nyalo bedo timbewa mabeyo, to ok kwongo somone Muma