Be Nyithindi Oseikore?
1. Ang’o momiyo dwarore ni nyithindo ma dhi skul obed moikore?
1 Onge kiawa ni nyithindwa biro romo gi tembe manyien bang’ yawo skul. Bende gibiro bedo gi thuolo momedore mar chiwo ‘neno e wi adiera.’ (Joh. 18:37) Be giseikore?
2. Mondo nyithindi obed moikore, ang’o madwarore ni ging’e?
2 Be nyithindi ong’eyo maler gik manyalo miyo ng’ato oriw lwedo nyasi mag piny gi mag dinde mag miriambo kod gimomiyo ok owinjore gitim nyasigo? Be giseiko gima gibiro wacho seche ma ijiwogi luwo somo mamalo, timo osiep mar kisera kaachiel gi madho kong’o kata yedhe mamero? Be ging’eyo kaka ginyalo lero yie margi koso gibiro mana wacho ni din-gi ema ok oyie gi tim moro?—1 Pet. 3:15.
3. Jonyuol nyalo iko nyithindgi nade e thuolo mag Lamo mar Joot?
3 Ti gi Thuolo mar Lamo mar Joot: En adier ni ibiro bedo kiwuoyo gi nyithindi kuom chandruok ma gibiro romogo nyaka gitiek skul. Kinda mitimo e wuoyo gi nyithindi e wi weche motudore gi skul kapok giyepo biro miyo gibed gi chir seche ma gidok. Donge nyalo bedo maber ka ukonyogi e thuolo maru mar Lamo mar Joot? Inyalo penjo nyithindi gima miyogi luoro ahinya seche ma giparo dok e skul. Unyalo wuoyo kuom gik ma ne usewuoyoe e higini mokalo, nimar koro nyithindo osebedo madongo kendo ng’eyo margi omedore. (Zab. 119:95) Unyalo bedo gi thuolo mar tiegruok ka in ikawo kar japuonj, jal makonyo nyithindo e skul e wi somo mamalo, kata nyathi skul moro. Puonj nyithindi kaka ginyalo dwoko penjo ka gitiyo gi Muma kendo kaka ginyalo tiyo gi buge kaka Kutoa Sababu kod Vijana Huuliza. Janyuol moro notiyo gi thuolo mar tiegruok mondo oik nyithinde kuom kaka ginyalo nyiso jopuonj ma giyudo e chak higa ni gin Joneno mag Jehova.—Ne Ohinga mar Jarito ma Desemba 15, 2010, ite mag 3-5.
4. Ang’o ma jonyuol mariek biro timo?
4 ‘Chandruoge’ ma Jokristo ma rowere nyaka romgo e ndalo mag gikogi medo bedo ma korgi tek. (2 Tim. 3:1) Jonyuol mariek biro paro chon kuom chandruoge manyalo yudo nyithindgi mondo giikgi kuom kaka ginyalo nyagore gi chandruogego. (Nge. 22:3) Kapok oyaw skul e chakruok mar higa, tim duto minyalo mondo ikony nyithindi oikre.