Be Iikori ne Skul?
1. Gin thuolo mage ma un-go e kinde ma uchako skul?
1 Kata obedo ni ma e higa mari mokwongo e skul kata isebedo e skul kuom higini moko, un rowere ma Jokristo uromo gi chandruoge kod tembe manyien kinde ka kinde. To un bende un kod thuolo manyien kinde ka kinde mag bedo ‘joneno kuom adiera.’ (Joh. 18:37) Be iikori maber mar lendo?
2. Iikori ne skul e yore mage?
2 Mondo omi gimoro amora mitimo e ngimani odhi maber, iseyudo tiegruok ahinya kowuok kuom Jehova, jonyuolni, kod jatichno mogen kendo mariek. (Nge. 1:8; 6:20; 23:23-25; Efe. 6:1-4; 2 Tim. 3:16, 17) Gie sani onge kiawa ni ing’eyo kit tembe ma ibiro romogo e skul. Nikech iseyudo tiegruok kuom dwaro mar Nyasaye, kendo iseng’eyo kaka timbe joma idhi bedogo e skul chal, ikri mar lendo. (Nge. 22:3) Kaw mapek puonj kod paro mag Ndiko mayudore e buge ariyo mag Vijana Huuliza kaachiel gi sula mamoko mag rowere migoyo pile e Amkeni!
3. Inyalo chiwo neno e yore mage?
3 Alwora mar lendo ma ibiro bedogo biro miyi thuolo makende mar chiwo neno e yore mopogore opogore. Seche ma jomoko neno ka iketo ranyisi maber kuom rwakruokni, timbeni koda wecheni mabeyo, kuom luor mimiyo joskul weteni kod jopuonj, kuom bedo ni itimo maber e penj, koda ka gineno ni in gi chuny mokuwe, moko kuomgi nyalo penjo kama, “Ang’o momiyo in to ipogori gi jomoko?” (Mal. 3:18; Joh. 15:19; 1 Tim. 2:9, 10) Mano nyalo bedo thuolo mar chiwo neno kendo lero yie mari. E higa mangima, nyalo bedo ni ibiro romo gi tembe kuom weche mag nyasi mag piny kod odiechienge mag rapar. Kapo ni openji gimomiyo ok idonj e weche ma kamago, be ibiro mana wacho ni, “Din marwa ok oyie gi nyasigo; An achiel kuom Joneno mag Jehova,” koso ibiro kawo thuolono mondo ichiw neno kuom Wuonu ma jahera, Jehova? Timo ikruok maber kiluwo kaka Jehova chiko joge biro konyi chiwo neno e yo maber ne jopuonjre weteni, jopuonj, kod jomamoko.—1 Pet. 3:15.
4. Ang’o momiyo inyalo bedo gadier ni gik moko biro dhini maber e skul?
4 Kata obedo ni inyalo bedo gi luoro mar dhi e skul, ng’e ni nitie ji mang’eny ma riwi lwedo kendo madwaro ni gik moko odhini maber ka in e skul. E wi mano, wamor kodi nikech thuolo ma in-go mar chiwo neno ni jomoko e skul. Omiyo bed jachir, kendo moikore ne skul!