Kik Iluor
1. Chir dwarore e seche mage, to nikech ang’o?
1 Be luoro osemiyo iweyo lendo e skul ka iparo ni idhi jari? En adier ni dwarore ni ibed gi chir mar wuoyo, to ahinya ka in ng’at ma wiye kuot. Ang’o mabiro konyi?
2. Kodok korka lendo e skul, ere kaka tiyo gi rieko nyalo konyowa?
2 Ti gi Rieko: Kata obedo ni skul nyalo bedo alwora mari mar lendo, gima onego ipar en ni ok ochuno ni ichak lendo ne ng’ato ang’ata kaka dine itimo ka ilendo ot ka ot. Ti gi rieko e ng’eyo kinde mowinjore iwuo. (Ekl. 3:1, 7) Wach moro ma ipuonjou e klas kata tije moko mag skul nyalo miyi thuolo mar wuoyo e wi yieni. Kata nyathi skul wadu nyalo penji gimomiyo ok itim gik mamoko mitimo e skul. Jokristo moko osenyiso jopuonjgi e chak higa ka oyaw skul ni gin Joneno mag Jehova kendo miyogi buge malero gik ma wayiego. Moko joweyo bugewa e wi desk mondo nyithi skul wetegi openjgi penjo e wi bugego.
3. Ere kaka inyalo ikori ne chiwo neno e skul?
3 Ikri: Ka iikori, chir mari biro medore. (1 Pet. 3:15) Omiyo tem paro motelo penjo ma inyalo penji kod dwoko ma inyalo chiwo. (Nge. 15:28) Ka nyalore, seche ma idhi skul iting’ Mumbi kod buge moko kaka, Kutoa Sababu, Vijana Huuliza, kod moko mawuoyo e wi chwech mondo okonyi e lero weche moko ka mano dwarore. Inyalo kwayo jonyuolni mondo ubed gi kinde mag tiegruok seche ma utimo lamo mar joot.
4. Ang’o momiyo onego idhi nyime chiwo neno e skul?
4 Bed gi Paro Mowinjore: Kik ipar ni kinde duto nyithi skul weteni biro mana jari seche miwuoyo e wi adiera. Moko kuomgi nyalo puoyi kuom chir mari kendo ginyalo kata chikoni itgi. Kata kamano kik chunyi tho kapo ni onge ng’at morwako wach. Jehova biro bedo mamor ni ne ilendo. (Hib. 13:15, 16) Med kwaye mondo okonyi idhi nyime wuoyo ‘gi chir chuth.’ (Tich 4:29; 2 Tim. 1:7, 8) Parie mor mibiro bedogo ka ng’ato owinjo wach ma ilando. Bang’e ng’atno nyalo kata bedo jatich Jehova wadu!