‘Nying Nyasaye Mondo Obed Maler’
1. Wi chokruok mar alwora ma higa 2012 mar tijwa nobed ang’o, to ogole kanye?
1 Mano kaka en gima ber bedo joma iluongo gi nying Jehova ma en Jaloch e wi gik moko duto! Nyasaye owuon ema nomiyowa thuolo mar tiyo gi nyinge, to moloyo chakre higa mar 1931 ji osebedo ka ong’eyowa gi nying makendeni ma en Joneno mag Jehova. (Isa. 43:10) Wuod Nyasaye ma miderma, Yesu nomiyo nying Nyasaye duong’, kendo mano ema nochakogo e lamo mar Ruoth. (Math. 6:9) Wi chokruok marwa mar alwora ma higa 2012 mar tijwa ogol e weche ma Yesu nowachogo. Wiyeno en, “Nying Nyasaye Mondo Obed Maler.”
2. Weche mage mwageno yudo e chokruogni?
2 Gima Wageno Winjo: Chieng’ Ngeso, twak mawacho ni “Mi Nying Nyasaye Ong’ere Kuom Tiyone e Thuoloni Duto” biro nyiso gimomiyo tiyo ne Nyasaye kuom thuolo duto e ngima maberie moloyo. Bende wabiro winjo twak mopogi e migepe mawacho ni “Tang’ Kik Ikel Achaya ne Nying Jehova,” mabiro konyowa tang’ ne gik moko ang’wen manyalo makowa. Twak mawacho ni “Gimomiyo Nyaka Ket Nying Nyasaye Obed Maler,” biro chiwo dwoko mag penjo ariyogi, Ang’o mabiro konyowa timo kinda e tij lendo kata seche ma ji ok rwak wach? kod, Ang’o mabiro konyowa yudo nyak e tijwa mar lendo? Chieng’ Jumapil wabiro winjo twak mopogi e migepe ang’wen mabiro nyiso kaka wanyalo keto nying Nyasaye obed maler kuom gik mwaparo, mwawacho, yiero mwatimo, kod timbewa. Joma nyien biro mor ahinya winjo twak mar ji duto mawacho ni “Jehova Biro Pwodho Nyinge Maduong’ e Har–Magedon.”
3. En migawo mane makende ma wan-go, kendo chokruogni biro konyowa nade?
3 Kinde okayo ma Jehova biro kawo okang’ mondo oket nyinge obed maler. (Eze. 36:23) Kapok kindeno ochopo, wan gi migawo makende mar dak kaluwore gi gima nying Jehova malerno ochung’ne. Wan gadier ni chokruok mar alworani biro konyo ng’ato ka ng’ato kuomwa kawo gi pek ting’ ma wan-go mar bedo joma iluongo gi nying Nyasaye.