Chiwo Momi Jotich Nyasaye
1. En chenro mane manyien ma nochak e higa mar 1938, to nochake nikech ang’o?
1 E higa mar 1938, riwruok mar oganda Jehova nochako chenro manyien. Kanyakla mopogore opogore ma ne yudore e alwora moro nogwel e chokruok masani iluongo ni chokruok mar alwora. Ang’o momiyo nogwelgi? Informant (masani iluongo ni Tijwa mar Pinyruoth) ma Januar e higa mar 1939 nodwoko kama: “Chokruogegi gin Chenro ma Riwruok mar Jehova otimo mondo okonywa e tij Pinyruodhe. Weche michiwo e chokruogego gin makonyo ng’ato ka ng’ato mondo oti tich momiye e yo mowinjore.” Kaluwore gi medruok mosebedoe kuom jolendo mag Pinyruoth chakre jolendo 58,000 e higa mar 1938 nyaka jolendo mokalo 7,000,000 e higa mar 2009, en adier ni chokruok mag alwora konyo jotich Nyasaye ‘tiyo tich momigi’!
2. Gin weche mage mibiro wuoyoe e chokruok mar alwora e higa manyien mar tijwa?
2 Wi Chokruok ma Higa Mabiro: Wageno ahinya program mar chokruok mar alwora ma nochakre Septemba kod jip mwabiro yudo e chokruogno. Wiye maduong’ en “Ok Un mag Piny” kaluwore gi Johana 15:19. Moko kuom twege mabiro jiwo jotich Nyasaye gin mage? Chieng’ Ngeso wabiro winjo twak ma wiye wacho ni, “Tiyo Tij Nyasaye e Thuolo Duto Ritowa—E Yo Mane?” Bende wabiro winjo twak mopogi e migepe adek, ma wiye en, “Kik Iwe Mondo Ochidi gi . . .” “Ondiek,” “Jaterruok Maduong’,” kod “Jolok Ohala.” Chieng’ Jumapil wabiro winjo twak mopogi e migepe ma wiye nobed “Her Jehova, Ok Piny.” Twege mamoko oriwo “Dhiuru Nyime Bedo ‘Jowuoth gi Jodak,’” kod “Timuru Chir! Unyalo Loyo Piny.”
3. Gin ber mage mwabiro yudo kuom bedo e chokruok mar alwora?
3 Bang’ dhi e chokruok mar alwora ma nyocha eka oa otim, nyaminwa moro ma noyudo odok chien e tij lendo nondiko ni programno nokonye nono chal mare kendo nong’ado ni obiro “tiyo tij lendo kendo weyo bedo jasamwoyo!” Onge kiawa ni program mar chokruok mar alwora ma higa manyien mar tijwa biro konyowa hero Jehova to ok piny. (1 Joh. 2:15-17) Tim matek mondo ichop e chokruogno kendo ichik iti malong’o mondo iyud ber chuth kuom chenroni manyiso hera ne jotich Nyasaye!