Program Manyien mar Chokruok mar Alwora
Ang’o manyalo konyowa chung’ motegno e kind jogo makwedo lamo madier? Ere kaka wanyalo loyo kinda mar Satan mar temo dwokowa e piny ma ok oluoro Nyasaye? Program mar chokruok mar alwora ma higa 2009 biro dwoko penjo madongogi. Wiye nobed, “Lo Richo gi Gima Ber.” (Rumi 12:21) Ne ane gik ma oseiknwa.
Jarit-distrikt biro golo twege mawacho ni, “Osemiwa Teko mar Loyo Richo gi Gima Ber,” “Bed Motang’ Kuom Paro ni Ok Inyal Lwar!,” “Richo Duto Chiegni Rumo!,” kod “Jiwo Yie Marwa Mondo Walo Piny.” Jarit-alwora biro golo twege maluwogi, “Magi E Kinde mag Ritruok Kuom Nindo!,” kaluwore gi Jo Rumi 13:11-13, kod “Kik Nong’no Oteri Chieng’ Chandruok,” kaluwore gi Ngeche 24:10. Wageno winjo twak mar jarit-alwora mawuoyo kuom “Wuoyo Kuom Weche mag Alwora.” Twak machielo mabiro jiwowa en, “Be Inyalo ‘Tiyo Tij Lendo’ Kaka Painia?” Twak mokwongo mopogi e migepe, wiye en “Tamuru Wuond Mariek mag Satan.” Twagno biro konyowa fwenyo kendo kwedo wuond mariek mag Jachien e weche dongruok mag dhano e loso masinde, e yore mag manyo mor, kod weche somo. Twak mar ariyo mopogi e migepe ma wiye en, “Beduru Motegno mar Sirruok E Ndalo Marachni,” biro nyisowa kaka wanyalo medo tiyo gi puonj mag siem mokudh gi much Nyasaye mayudore e Jo Efeso 6:10-18.
Nitie tudruok e kind loyo richo kama ochakore kod lando wach Pinyruoth. (Fwe. 12:17) Mano e gima omiyo Satan siko ka monjo Joneno mag Jehova! (Isa. 43:10, 12) Kata kamano, Jachien ok bi loyowa nikech waseng’ado ni wabiro ‘loyo richo gi gima ber.’ Los chenro mar bedoe mondo iyud kony chuth kuom program duto mar chokruok mar odiechienge ariyogi.