Chokruok mar Alwora Makonyowa Rito Winjruokwa gi Nyasaye

1. Mich achiel mawuok kuom Jehova mabiro konyowa chopo tijwa mar lando wach maber en mane?

¹ Jehova chiwonwa e yo mang’won weche monego watigo, otiegowa kendo ojiwowa mondo wachop ote ma osemiyowa mar lando wach maber. (Math. 24:14; 2 Tim. 4:⁠17) Achiel kuom yore ma Jehova timonwago kamano en chokruok mar alwora ma higa ka higa. Program manyien mar chokruogni e higa mar tijwa mar 2010 ibiro nonie wiye mawacho ni “Rit Winjruok Mari gi Nyasaye” kaluwore gi Jo Rumi 8:5 kod Juda 17-⁠19. Programno biro chakore e juma mar Agost 31, 2009.

2. (a) Chokruok mar alwora biro konyowa e yore mage? (b) Ere kaka chokruoge mag alwora ma ne otim e kinde mokalo osekonyi e tij lendo?

² Kaka Wabiro Yudo Kony: Chokruogni biro konyowa neno gik manyalo kelonwa hinyruok, kaka mago manyalo miyo wati marach gi sechewa kendo golo pachwa kuom gik madwarore moloyo. Wabiro puonjore kaka wanyalo loyo chuny mar bedo joma ok dew winjruokgi gi Nyasaye, kendo wabiro nono tiend bedo joma dewo winjruokgi gi Nyasaye. Twak mopogi e migepe ma ibiro golo Jumapil biro nyiso kaka ng’ato ka ng’ato kod joot nyalo kawo okang’ mag jiwo winjruokgi gi Nyasaye seche ma giromo gi tembe mager kuom yiegi kod gik manyalo ywayogi. Chokruogni biro konyowa rito chunywa, rito winjruokwa gi Nyasaye, kendo keto pachwa kuom gweth madongo mabiro yudo jogo ma rito winjruokgi gi Nyasaye.

3. Chokruok maru mar alwora ibiro tim karang’o, to iseng’ado mar timo ang’o?

³ Bang’ ng’eyo tarik kod kama ibiro timoe chokruok mabiro mar alwora, tim chenro mondo omi ibi ibedie kendo chiko iti ne program duto mag odiechienge ariyogo. Bed gadier ni Jehova gwedho lwet ng’ama jakinda.​​​—⁠⁠Nge. 21:5.

4. Wan gadier ni wabiro yudo ang’o e chokruok mabiro mar alwora?

⁴ Kuom adier, Jehova e Jachiwo mar mich maberni. Chokruogni ma kweth mar jatichno mogen oiko, dwarore ahinya mondo omi wadhi nyime kaka jotich ma Jokristo. Wadwoko ne Jehova erokamano nikech michne duto mag hera mochiwonwa mondo okonyowa ‘mako matek genono mwahulo maonge mindni.’​​​—⁠⁠Hib. 10:⁠23-​25; Jak. 1:⁠17.