Rit Pachi
1. Chokruok mar alwora ma higa 2013 mar tijwa nobed gi wich mane, to ang’o momiyo olose?
1 Yesu nonyiso jopuonjrene mondo oher Jehova gi igi, chunygi, kod pachgi duto. (Math. 22:37, 38) Chokruoge ma higani mag distrikt kod mag alwora oiki mondo okonywa rito gima wan gie iwa. Inyalo paro ni wi chokruog-distrikt en “Rit Chunyi!” Wi chokruok makende mar alwora ma higa 2013 mar tijwa en “Rit Chunyi mar Pogo Ber gi Rach.” Chokruoge mag alwora mabiro chakore dwe mabiro nobed gi wich mawacho ni “Rit Pachi,” ma isiro gi Mathayo 22:37, Luo New Testament, 2003. Programni olosi mondo okonywa nono pachwa wawegi mondo gik ma waparo omor Jehova.
2. Gin penjo mage monego wamany dwokogi sama wabiro bedo e chokruok mar alwora?
2 Gik Moiknwa: Sama wabiro winjo twege e chokruok mar alwora, wabiro yudo weche madongo ka wamanyo dwoko mag penjo maluwogi:
• Ere kaka wanyalo tang’ ne ‘paro mag dhano’?
• Ere kaka wanyalo konyo e golo rageng’ ma umo pach jogo maok oyie?
• En paro machalo nade ma wadwaro bedogo?
• Gin ber mage mabedoe nikech paro matut kuom gik mowinjore?
• Ere kaka wanyalo weyo mondo Jehova ochik pachwa?
• Ang’o ma chwo, mon, jonyuol, koda nyithindo nyalo timo mondo gimi ngima mar joot obed mamor?
• Ere kaka wanyalo bedo moikore ne odiechieng’no mar Jehova?
• Tiend tego pachwa ne tich en ang’o?
• Gin gweth mage ma jogo matiyo gi gik ma gipuonjore yudo?
3. Ang’o momiyo ber ka wabedo e chokruok mar alwora kuom ndalo ariyo duto, chiko itwa maber, kendo tiyo gi puonj mwayudo?
3 Satan kedo ahinya mondo ochoch pachwa. (2 Kor. 11:3) Omiyo nyaka waked matek mondo warit pachwa. Dwarore ni wadhi nyime bedo gi paro kaka mar Kristo kendo wanyagre gi timbe maricho monya e pinyni. (1 Kor. 2:16) Kuom mano, tim chenro mondo ibedie ndalo ariyogo duto mag chokruok mar alwora. Ichik iti maber ne program. Ka watiyo gi puonj mabeyo ma wabiro yudo e chokruogno, wabiro tego pachwa ne timo tij Pinyruoth gi kinda.—1 Pet. 1:13.