Wach Nyasaye Konyo Kuom Puonjo Ji
1. Wi chokruok mar alwora ma higa 2014 en mane, to en penjo mane ma wabiro yudo dwokone e chokruogno?
1 Jehova ma e Japuonjwa Maduong’, e japuonj maberie moloyo e piny gi polo. (Isa. 30:20, 21) Kata kamano, ere kaka Jehova puonjowa? Osemiyowa Muma, ma e buk maberie moloyo buk moro amora nikech ondike kuom much Nyasaye. Ere kaka puonj mag Nyasaye nyalo konyowa mondo wabed gi ngima maber, paro maler, chuny mokuwe kendo bedo gi winjruok maber gi Nyasaye? Chokruokwa mar alwora ma higa 2014 biro konyowa yudo dwoko mar penjono. Wi chokruogno wacho ni “Wach Nyasaye Konyo Kuom Puonjo Ji,” misiro gi ndiko mar 2 Timotheo 3:16.
2. Gin penjo mage mabiro konyowa yudo weche madongo e chokruok mar alwora mabiro?
2 Many Weche Madongo: Wabiro yudo weche madongo e chokruok mar alwora mabiro sama idwoko penjo maluwogi:
• Ere kaka puonj mag Muma nyalo konyowa? (Isa. 48:17, 18)
• Ka watimo lokruok e ngimawa mondo wati ne Nyasaye kuom thuolowa duto, wanyalo bedo gadier kuom wach mane? (Mal. 3:10)
• Ang’o monego watim sama waromo gi ‘puonj magalagala’? (Hib. 13:9)
• Ere kaka wanyalo luwo yo ma Yesu ne ‘puonjogo’? (Math. 7:28, 29)
• Ang’o momiyo joma puonjo e kanyakla onego opuonjre giwegi? (Rumi 2:21)
• Wach Nyasaye konyowa e yore mage? (2 Tim. 3:16)
• En ber mane mabedoe nikech Jehova ‘yiengo’ ogendni? (Hag. 2:6, 7)
• En ang’o ma Jehova nigo gadier ni wanyalo timo? (Efe. 5:1)
• Ang’o momiyo nyaka waked matek mondo wasiki e puonj mag Jehova? (Luka 13:24)
3. Ang’o momiyo onego wachop e chokruok mar alwora mabiro kendo chiko itwa ne puonj ma oiknwa e kinde mowinjore?
3 Kane Paulo ndiko weche manie 2 Timotheo sula mar 3, nochako gi lero chandruoge ma ne dhi nyiso ni wadak e ndalo mag giko kapok ondiko weche masiro wi chokruogni. Nondiko kama: “To ji maricho gi jo ma wuondore nomed bedo marach moloyo, ka gi wuondo ji, kendo kiwouondogi.” (2 Tim. 3:13) Mondo kik wuondwa, donge onego wawinj kendo tiyo gi puonj mag Muma? Kuom mano, wang’aduru mar chopo e chokruogno kendo chiko itwa ne puonj ma oiknwa e kinde mowinjore.