Wach Nyasaye Tiyo
1. Wi chokruok makende mar alwora ma higa 2014 en mane?
1 Muma opogore gi gimoro amora ma dhano morem nyalo loso, nikech en gi teko mar lokowa, kendo orieyo pachwa gi timbewa mondo owinjre gi dwaro mar Jehova. Wach Nyasaye nigi teko e okang’ maromo nade? Ang’o monego watim mondo teko mar Wach Nyasaye oti e ngimawa? Ere kaka wanyalo tiyo gi Wach Nyasaye e yo molony mondo wakony jomamoko? Chokruok makende mar alwora ma higa 2014 biro konyowa yudo dwoko mag penjogo. Wan gadier chuth ni program moiknwano biro gero winjruok ma wan-go gi Jehova. Wi chokruogno wacho ni “Wach Nyasaye Tiyo,” misiro gi ndiko mar Jo Hibrania 4:12.
2. Gin penjo mage monego wamany dwokogi sama program dhi nyime?
2 Many Dwoko mag Penjogi: Sama program dhi nyime, tem manyo dwoko mag penjo maluwogi:
• Ang’o momiyo onego wagen Wach Jehova? (Zab. 29:4)
• Ang’o mwanyalo timo mondo wane ber mar Wach Nyasaye e ngimawa wawegi? (Zab. 34:8)
• Sama wan e tij lendo, en ang’o mwanyalo timo mondo wanyis ni Wach Nyasaye tiyo? (2 Tim. 3:16, 17)
• Ere kaka wanyalo tang’ ne wuond maricho mag piny Satanni? (1 Joh. 5:19)
• Un rowere, ang’o ma unyalo timo mondo utim dongruok e winjruok maru gi Jehova? (Yer. 17:7)
• Ere kaka wanyalo bedo gi teko kata sama wawinjo ka wanyap? (2 Kor. 12:10)
• En ang’o monego watim mondo wadhi nyime timo lokruok e ngimawa, kata kapo ni nitie paro kod timbe moko manyalo bedonwa matek weyo? (Efe. 4:23)
3. Mopogore gi winjo program, gin thuolo mage kendo ma wan-go mag yudo jip sama wabiro bedo e chokruok makende mabiro?
3 To mano kaka wabiro yudo jip ka wachiko itwa sama inono wechego! E wi mano, mana kaka jabedoga e chokruok mar alwora kod mar distrikt, chokruok makendeni bende biro miyowa thuolo mar ng’eruok gi owete gi nyimine ma a e kanyakla mamoko kendo yudo mor kuom bedo kanyachiel kodgi. (Zab. 133:1-3; 2 Kor. 6:11-13) Omiyo, many thuolo mar goyo mbaka gi osiepeni kendo imak osiep gi jomamoko manyien. Kapo ni ofis ooro owadwa moro moa Bethel, kata jarit-distrikt kaka jagol-twak, donge nyalo bedo maber ka ikawo thuolo mar mose kaachiel gi jaode? Kuom adier, wan gi gik mang’eny ma miyo warito chokruok makendeno gi siso!