Program Manyien mar Chokruok Makende

Wiye maduong’ mar program mar chokruok makende mar alwora ma higa 2009 en “Rit Tich Ma Nomiyi . . . , Ichope Chuth,” kaluwore gi Jo Kolosai 4:⁠17. Kaka Jokristo, wakawo jipno mapek. Dwarowa en chopo tijwa mar lendo ma ok wawe, mana kaka Yesu notimo. (Joh. 17:4) Jaote Paulo bende ne oketo ranyisi maber ahinya kuom wachni. Ne ong’ado ni nyaka otiek tije mar lendo.​​—⁠Tich 20:24.

Jarit-alwora biro golo twak manyiso kaka jolendo mopogore opogore loyo chandruoge e tijgi mar lendo. Bang’e twak mawacho ni, “Med Rito Gima Ichwoyo” biro jiwo kaka wanyalo konyo jogo “ma [“chunygi oikore,” NW ] ni ngima mochwere.” (Tich 13:48) Jagol-twak ma ofis ooro biro wuoyo kuom kwan matindo mag 2 Jo Korintho 6:⁠1-⁠10, twak mawacho ni “Kaka Wanyisore ni Wan Jotich Nyasaye.” E program modhiambo, obiro golo twak ma wiye en “Kaw Tiji mar Lendo Kaka Gima Duong’ Ahinya.” Onge kiawa ni ubiro yudo jip kuom twege maluwogi, “Rowere kod Joma Dongo Moruru E Tij Lendo” kod “Rowere Machopo Tij Lendo.” Jogo madwaro nyiso chiwruokgi ne Nyasaye e yor batiso mar pi e achiel kuom chokruoge mag alwora mabiro onego onyis jarit matayo kanyakla mapiyo kaka nyalore. Achiel kuom migepe madongo e chokruogewa mag alwora koda mag distrikt en nono Ohinga mar Jarito. Ting’ Ohinga mar Jarito ma ibiro puonjruok e juma mar chokruok makende mar alwora.

Mondo omi warit tijwa mar lendo mondo wachope, watimo matek neno ni weche mamoko ok kaw thuolo mar tich ma Jehova osemiyowa. Jip mawuok e Ndiko ma wabiro yudo e program mar chokruok makendeni mar alwora, onego konywa ng’eyo gima onego watim mondo wadhi nyime keto chunywa e tij lendo kendo nono kaka watimo e tij lendo mondo wachope chutho.