Program mar Chokruok Makende mar Alwora 2010
1. (a) Gin wiye mage mag chokruoge makende mag alwora ma wuok e Ndiko ma osetim e ndalo mokalo? (b) Be nitie weche moko mag chokruoge makende mag alwora mokalo ma osekonyi e tiji mar lendo?
1 “Uyie kod Weche Makare,” “Chung’uru Matek Kaka Kweth Achiel,” “Dhiuru Nyime Timo Neno Kuom Adiera,” kod “Wan Lop Agulu—Jehova e Jachwechwa.” (Fili. 1:9, 10, 27; Joh. 18:37; Isa. 64:8) Magi gin moko kuom wiye mag chokruoge makende mag alwora ma ne otim e ndalo mokalo. Be in gi ilo mar dhi e chokruok makende mar alwora mar higa 2010? Chokruogno biro wuoyo kuom wiye mowuok e 1 Jo-Korintho 7:29 mawacho ni: “Ndalo Modong’ Nok.”
2. Ere kaka wanyalo bedo gi ilo kuom chokruogni?
2 Bang’ ka oseland tarik mar chokruok makende mar alwora e kanyaklau, chak bedo gi ilo kuome. Jonyuol moko konyo nyithindgi bedo gi ilo kuom chokruogni kendo ndiko tarigno e kalendagi kaachiel gi gigo ma gibiro tiyogo e chokruok, kae to kinde ka kinde gikwano odiechienge modong’ nyaka chop odiechieng chokruogno. E Lamo mar Joot modhiambo, unyalo yiero wuoyo kuom thuond weche ma ne undiko e chokruoge makende mag alwora mosetim. Bende inyalo iko chunyi ne chokruogni kuom nono weche manie bug Faidika na Elimu ya Shule ya Huduma ya Kitheokrasi, ite mag 13-16, mondo okonyi in kaachiel gi joodi ‘uritre kuom gima uwinjo.’—Luka 8:18.
3. Ere kaka wanyalo yudo ber chuth kuom programni?
3 Ti gi Gik Mipuonjori: Gima ji thoro wacho bang’ chokruok en, “Mano ne en program maber miwuoro!” Kinde duto mano en adier, nikech chokruogni en achiel kuom mich ma Jehova chiwonwa. (Nge. 10:22) Mondo gik mipuonjori okonyi, nyaka ipar matut kuomgi kendo imakgi matek. (Luka 8:15) Kawuru kinde mar wuoyo kuom wechego kaka joot kata wuoyo kuomgi gi joma moko ma un-go e mtoka seche ma udok pacho bang’ chokruok. Wuouru kuom chenro ma ng’ato ka ng’ato kuomu ng’ado mar chopo kod paro mabiro konyou e tij lendo. Timo kamano biro konyou yudo ber kuom chokruogno kata bang’ kinde malach.—Jak. 1:25.
4. Ang’o momiyo chokruogni biro konyowa ahinya?
4 Kinde duto wabedo mamor ahinya ka mich mwayudo ema ne dwarore ahinya e ngimawa. Donge wageno kendo bedo gi ilo ka warito chokruok makende mar alwora mabiro ma Jehova oseikonwa? Wanyalo bedo gadier ni chokruogni biro konyowa e yore duto. Gima wanyalo geno yudo kuom Wuonwa me polo, Jehova, en mich mowinjore kokalo kuom jip kod tiegruok mondo wati tich ma osemiyowa.—2 Tim. 4:2; Jak. 1:17.