Rit Chunyi mar Pogo Ber gi Rach

1. Chokruok makende mar alwora ma higa 2013 mar tijwa nobed gi wich mane, to ang’o momiyo olose?

¹ Odiechieng’ kodiechieng’, waromo gi weche moko manyalo miyo waketh chunywa mar pogo ber gi rach. Mano emomiyo chokruok makende mar alwora ma higa 2013 mar tijwa ma biro chakore Septemba 1, 2012, nigi wich mawacho ni “Rit Chunyi mar Pogo Ber gi Rach.” (1 Tim. 1:19) Olos chokruogno mondo okonywa paro matut kuom kaka watiyo gi mich makendeni ma Jachwechwa omiyowa.

2. Penjo mage ma ibiro chiw dwokogi e chokruok makende mar alwora?

² Many Dwoko mag Penjogi: Chokruogno biro chiwo dwoko mag penjo abiriyo madongo motudore gi chunywa mar pogo ber gi rach:

• Gin gik mage manyalo ketho chunywa mar pogo ber gi rach?

• Ere kaka wanyalo tiego chunywa mondo opog ber gi rach?

• Ere kaka wanyalo bedo gi chuny maonge bura kuom remb ji duto?

• Paro ma wan-go kuom puonj mag Muma kod kaka watiyo gi puonjgo nyiso ang’o kuomwa?

• Ere kaka wanyalo tang’ mondo gik ma watimo kik chwany chuny jomamoko?

• Un rowere, ere kaka unyalo chung’ motegno sama uromo gi tembe manyalo miyo uketh chike Nyasaye?

• Joma oyie mondo roho mar Nyasaye ota chunygi yudo gweth mage?

3. Chokruok makende mar alwora biro konyowa e yore mage?

³ Ka wageno kony ma Jehova miyowa, wabiro kwedo yore ma Satan tiyogo e temo ketho chunywa mar pogo ber gi rach. Kokalo kuom Wach Nyasaye kod riwruok mar ogandane, Wuonwa ma jahera me polo nyisowa kama: “Ma e yo, wuothieuru.” (Isa. 30:21) Chokruogni en achiel kuom yore ma Jehova tayowago. Omiyo, tim chenro mondo ibed e program duto. Ket pachi duto e program kendo inon kaka inyalo tiyo gi puonj mwayudo. Wuouru kaka joot kuom weche ma upuonjoru e chokruogno. Ka watiyo gi puonj ma wayudo, wabiro bedo gi teko mar dhi nyime ka wan gi “chuny maler,” kendo wabiro bedo motang’ mondo kik Satan ti gi gombo mag piny makadhoni e golowa e yor ngima.—1 Pet. 3:16.