Kony Wuon Ot Mondo Ochiw Pache
1. En yo mane maber ahinya tiyogo e tij lendo?
1 En yo mane maber ahinya tiyogo e lendo—ma ng’ato ok mi wuon ot thuolo mar chiwo pache koso ma jalendo konyo wuon ot mondo ochiw pache kae to okonye bedo gi paro mowinjore kuom wach miwuoyoe? Jaote Paulo notiyo gi yo mar ariyono kane olendo ne Jo-Yahudi ma ne ni Thessalonika mi “jomoko kuomgi noyie.” (Tich 17:2-4) Wuoyo gi jomoko ka gin bende gichiwo pachgi oriwo timo ang’o?
2. Ere kaka wanyalo luwo ranyisi mar Paulo seche ma walando wach maber?
2 Non Paro ma Gin-go kod Kit Ngimagi: Ka wang’eyo paro kod gik ma joma walendonegi alworawa oyiego, mano biro konyowa wuoyo gi wuon ot ka en bende ochiwo pache. Paulo nochako twak gi Jo-Grik ma ne ok oyie kuom Nyasaye e Areopago kuom chako wuoyo e wi gik ma ne ging’eyo kendo yiego. (Tich 17:22-31) Omiyo, seche ma iiko weche ma idhi tiyogo e lendo, ket e paro gik ma ji manie alworau oyiego. (1 Kor. 9:19-22) Kapo ni wuon ot kwedo, tem mondo iyud wach moro ma uduto uyiego kendo mano ema uwuoye.
3. Ere kaka wanyalo konyo ji e yo maber mondo gichiw pachgi ka watiyo gi penjo e yo molony?
3 Ti gi Penjo e Yo Molony: Ok wanyal nyiso jawuoth kama onego oluw mondo ochop kama odhiye ka ok wang’eyo ni osechopo kanye e wuodhe. E yo machalo kamano, ok wanyal konyo wuon ot chopo e paro mowinjore ka ok wang’eyo paro ma en-go gie sano. Kane Yesu pok ochako wuoyo e wi wach moro, kinde mang’eny notiyo gi penjo mondo ong’e pach jawinjone. Kuom ranyisi, kane ng’ato openjo Yesu ni, “Natim ang’o mondo acham gikeni ma en ngima mochwere?,” Yesu nokwongo otemo ng’eyo paro ma ng’atno nigo kapok odwoke. (Luka 10:25-28) E kinde moro kane Petro ochiwo dwoko maok nikare, Yesu notiyo gi penjo e yo molony mondo orie pache. (Math. 17:24-26) Omiyo, ka wuon ot openjo penjo kata ochiwo paro maok nikare, wanyalo tiyo gi penjo mondo wakonye neno weche e yo makare.
4. Ang’o momiyo onego watem konyo wuon ot mondo ochiw pache?
4 Ka wakonyo wuon ot mondo ochiw pache e wach moro, waluwo ranyisi mar Japuonj Maduong’, Yesu kod joland injili molony mag kinde Jokristo mokwongo. Ka wachiwo thuolo mondo wuon ot ochiw pache, wamiye luor. (1 Pet. 3:15, 16) Kuom timo mano, onyalo dwaro mondo waduog chieng’ machielo.