Kaka Wanyalo Medo Lony e Tij Lendo—Chiwo Bug Muma Puonjo

Gimomiyo Mano Dwarore: Bug Muma Puonjo e buk mwatiyogo ahinya e puonjo ji. Kata kamano, donge nyaka wakwong wami ng’ato bugno kapok wachako puonjore kode? Omiyo, dwarore ni waduto wabed molony e chiwo bug Muma Puonjo sama wan e tij lendo. (Nge. 22:29) Nitie yore mathoth mag chiwo bugno, kendo jolendo nyalo tiyo gi yo moro amora ma nigi nyak sama gilendo.

Kaka Wanyalo Timo Mano:

Penj wuon ot penjo ma nyalo miyo ochiw pache kuom wach moro, kae to iel sula motudore gi penjono e bug Muma Puonjo. Inyalo kata yiero achiel kuom penjo ma yudore e chak sula moro. Bang’ ka wuon ot osechiwo pache, som ndiko mowinjore gi wachno, kae to iel paragraf ma wuoyo kuom wachno, kendo unone kanyachiel.
Yo machielo en nyiso wuon ot wach moro ma nyalo more e ite mokwongo mag bugno, kae to inyise kama wachno iwuoyoe matut ei bugno. Kuom ranyisi, inyalo wuoyo e wi masira moro ma nyocha otimore, kae to inyise ni ji mang’eny gombo ahinya yudo dwoko mag penjo ma yudore e ite mar 3. Kata inyalo nyise ni ilimo jirendeni kinyisogi wach moro maber ma notimre kinde ma biro. Bang’ mano, nyise pichni ma yudore e ite mar 4 kod 5, kae to ipenje ni “En singo mane kuom monyis kaegi ma diher neno ka chopo?” Yo machielo minyalo tiyogo en wacho ni, ilimo ji kuom dakika machuok kikonyogi yudo dwoko mag penjo madongo ma gin-go. Kae to inyis ng’atno penjo ma yudore e ite mar 6, kendo kwaye mondo oyier penjo ma doher yudo dwokone.
Bende, inyalo chako puonjruok mar Muma achiel kachiel. Inyalo wacho niya: “Wanyiso jirendewa buk moro ma konyowa puonjore Muma. Be iseganeno bugni kamoro amora? [Rit dwoko.] Kimiya mana dakika machuok, anyalo nyisi kaka wanyalo tiyo gi bugni kaachiel gi Mumbi e puonjruok.”

Tem Timo Mae e Dweni:

E lamo maru mar joot, tiegreuru kutimo ranyisi kaka unyalo chiwo bugni.
Sama in e tij lendo, nyis jolendo weteni weche michano tiyogo sama ichiwe. (Nge. 27:17) Kapo ni yo mitiyogo onge gi nyak, inyalo tiyo gi yo machielo.