Sula Manyien Makonyo e Chako Puonjruok mar Muma
1. Sula mane manyien mabiro yudore e gocho mar ji duto mar Ohinga mar Jarito, to ochane e yo mane?
1 Chakre dwe manyien, sula manyien biro yudore e gocho mar ji duto mar Ohinga mar Jarito mabiro konyowa chako puonjruok mar Muma gi ji. Wiye en “Puonjri Kuom Wach Nyasaye.” Kata obedo ni jomoko e alworau biro hero somo wach ka wach kaka ochan-gi e sulani, sula manyienni ogo mondo okonywa e wuoyo gi weg udi.
2. Gin gik mage mayudore e sulani?
2 Gik Mayudore e Sulani: Wiye maduong’ kaachiel gi wiye matindo oket e yor penjo mwanyalo penjo wuon ot seche ma wawuoyo kode. Ndiko majiwo wach muwuoyoeno onyis kanyo mondo wuon ot osom achiel kachiel kowuok e Wach Nyasaye. Oket paragraf e yo machuok mondo owuoye gi ng’ato kuom dakika matin kata mana e dhoot. Sulagi duto teri e bug Muma Puonjo mondo uchak puonjoru bugno ka mano owinjore.
3. Seche mwalendo ot ka ot, ere kaka wanyalo tiyo gi sulani e chako puonjruok mar Muma gi ji kata kwachung’ e dhoot?
3 Kaka Inyalo Ti Kode: Seche mwachiwo gasedewa, wanyalo penjo wuon ot penjo moro motudore gi wi sula manyienni. Kuom ranyisi, gocho mar Januar 1 wuoyo kuom ber mar Muma. Inyalo penjo kama: “Iparo ni Muma en Wach Nyasaye koso en mana buk moro maber? [Rit dwoko.] Daher nyisi gimoro mabiro mori e wi wachni.” Kwong inyise penjo mokwongo, som paragraf mokwongo, kae to usom ndiko moket kanyo. Nwo penjo, kae to ikwa wuon ot mondo ochiw paro. Wuouru kuom wachno kaluwore gi thuolo mantie kutiyo gi penjo mochiw kanyo. Kapok iwuok, nyise penjo maluwo kendo ichan kaka ibiro dok mondo iwuo kode e wi penjono. Dog unon weche mamoko e sulano nyaka chop kinde mibiro kelone gocho maluwo mano. Paro machielo mwanyalo tiyogo en chako puonjruok mar Muma achiel kachiel gi wuon ot. Kae to wati gi sula manie gasedno e nyiso kaka watimo puonjruok mar Muma gi ji.
4. Ere kaka wanyalo tiyo gi sulani seche ma wadok timo limbe?
4 Inyalo tiyo gi sulani bende kuom jogo ma ijamiyo gasede manyien kaachiel gi joma idok timonegi limbe. Inyalo wacho kama: “Nitie sula manyien e Ohinga mar Jarito. Daher nyisi kaka itiyo kode.” Walemo ni sula manyienni biro konyo ji mang’eny ‘ng’eyo adiera chuth.’—1 Tim. 2:4.