Olosgi ne Tij Lendo
1. Sula mag “Goyo Mbaka gi Wuon Ot” konyo e chopo weche mage ariyo?
1 Kinde ka kinde, Ohinga mar Jarito mar ji duto ting’oga sula moko ma nigi wich mawacho ni, “Goyo Mbaka gi Wuon Ot.” Sulago konyo tieng’ diriyo. Mokwongo, gilero puonj mag Muma e yo mamit kendo ma mako pach jasomo. Mar ariyo, gikonyowa ng’eyo kaka wanyalo tiyo gi rieko sama wapuonjo ji wach moro. (1 Pet. 3:15) Ere kaka wanyalo tiyo maber gi sulago?
2. Ere kaka wanyalo tiyo gi sula mag “Goyo Mbaka gi Wuon Ot” e tij lendo?
2 Ti Kodgi e Tij Lendo: Inyalo kano gasede moko moting’o sulago. Sama japuonjre Muma kata ng’at machielo milendone openjo penjo kata owacho wach moro ma sulago nosewuoyoe, inyalo miye gaset ma noting’o wachno kendo inyise ni unyalo none kanyachiel. Kapo ni ionge gi gasedno, inyalo manye e Websaitwa mar jw.org/luo mondo igolne.
3. Ere kaka wanyalo nono sulago gi ng’ato?
3 Ere kaka wanyalo nono sulago gi ng’ato? Inyalo kwayo jal ma iwuoyogo mondo osom weche mag wuon ot, to in isom weche mag jalendo. Tiyo gi yorni ber nikech okonyo weg udi mondo onon gik ma wayiego ka gin thuolo.—Rapar 32:2.
4. Ere kaka wanyalo tiegore wawegi ka watiyo gi sula mag “Goyo Mbaka gi Wuon Ot”?
4 Ti Kodgi e Tiegori kod e Tiego Jomamoko: Sama isomo sulago, tem fwenyo kaka oler ndiko, ranyisi motigo, kod kaka mbakano iye otudore. Tem fwenyo chuny milerogo weche e sulano. Kae to tem kopo wechego sama ilendo. (Nge. 1:5; 9:9) Nyaminwa moro nowacho kama: “Sama asomo sulago, chalna mana ka gima painia moro molony chuth ema tiega—painia mong’eyo gima ng’ato onego owachi e sa mowinjore!”
5. Ere kaka wanyalo tiyo gi sulago e iko jopuonjrewa mag Muma ne tij lendo?
5 Inyalo tiyo bende gi sulago e tiego joma ipuonjorigo Muma, kiikogi ne tij lendo. Unyalo nono sulano kanyachiel gi japuonjre, ka en osomo weche mag wuon ot, to in isomo weche mag jalendo. Tiegruok ma kama konyo jopuonjre Muma mondo ging’e kaka ginyalo lero yiegi e yo mariek kendo mang’won. (Kol. 4:6) Kuom adier, sulago gin moko kuom yore ma Jehova tiyogo e konyowa mondo ‘wachop tich duto ma omiyowa.’—2 Tim. 4:5.