Be Itiyo gi Gocho mar Ji Duto e Yo Maber Chuth?
1 Bang’ somo Ohinga mar Jarito ma Januar 1, 2008, nyaminwa moro nondiko kama: “Agombo ahinya tiyo kode e tij lendo!” Be isenono weche moko ma pile nwang’ore e gocho mar ji duto mar Ohinga mar Jarito mar Swahili kod mar Ingresa, kendo yudo yore ma inyalo tiyogo kodgi maber e tij lendo?
2 “Gik Mwanyalo Puonjore Kuom Yesu”: Seche moko iseyudo ka sulani konyo e chako puonjruok Muma gi ji. Kapok itiyo gi sulano e chako puonjruok Muma gi ji, tem somo ne wuon ot wi wach mar sulano kae to inyise gima Yesu nowacho kuom wachno, kaka onyis e paragraf mokwongo. Ka wuon ot orwako wach, tem dhi nyime wuoyo kode kitiyo gi wiye matindo manie sulano moket e yor penjo. Kwa wuon ot mondo owuo kuom penjono. Ler e yo machuok piche motigo, kae to idhi e paragraf maluwo. Inyalo wuoyo kuom nus mar sulano e limbe mokwongo kendo inyalo wuoyo kuom nus machielo e limbe maluwo. Ikri mar dhi nyime gi puonjruokno e bug Muma Puonjo.
3 “Gigo Makelo Mor E Ngima Joot”: En sula, mayudore bang’ dweche adek ka bang’ dweche adek, oike mondo okony chwo, mon, koda jonyuol mondo gine kaka ginyalo tiyo gi puonj mag Muma e loyo chandruoge manyalo ketho kuwe mar joot. Inyalo bende tiyo gi weche mayudore e sulani e konyo joma ok gin Joneno mondo one puonj mariek mayudore e Muma.—2 Tim. 3:16, 17.
4 Weche Makonyo Joma Tindo: Sula mar “Ne Rowerewa” chiwo weche mabeyo makonyo jasomo paro kuom sigendini mag Muma kendo inyalo ti kode e timo nonro e wi weche mag Muma. Inyalo tiyo gi sulani e konyo rowere ma iromogo e tij lendo mondo gine ber mayudore kuom puonjruok Wach Nyasaye. (Zab. 119:9, 105) Seche ma iwuoyo gi jonyuol, inyalo wuoyo kuom sula mawacho ni “Puonj Nyithindi,” mawuok dwe ka dwe. Sulani nyalo konyo nyithindo matindo mondo oyud puonj mabeyo kuom joma iwuoyo kuomgi e Muma. Be isekawo kinde mar somo wechegi gi nyithindi?
5 Sula Mamoko: Sula mar “Josombwa Penjo” mawuok dwe ka dwe, nono penjo ma joma ok Joneno nyalo bedogo. Inyalo wuoyo kuom wi sulani seche ma ichiwo gasede e lendo mar ot ka ot. Sula mar “Barua Mowuok . . . ” en sula moting’o ripot mawuok kuom jomisonari gi joma moko ka ginyiso chandruoge moko ma giromogo e tij lendo. Sulani nyalo konyo joma rwako wach mondo one ni wach maber ilando e piny mangima, e chopo ranyisi mar bedoe mar Kristo.—Math. 24:3, 14.
6 Sula mar “Sud Machiegni gi Nyasaye” mawuok dwe ka dwe, ma otudore gi somo mar Muma mar Skul mar Tij Nyasaye, nyalo konyo joma chunygi oikore mondo odwar puonjore weche momedore kuom Jehova. Sula mar “Luwuru Yie Margi,” mawuok nyading’wen e higa, oik mondo okony ji neno weche ma gisomo e Muma kaka gik matimore e wang’gi, mamiyo joma iwuoyo kuomgi e Muma kod yiero ma ne gitimo, chandruoge ma ne giromogo gi yie margi onen maler ne josomo.
7 Mano kaka wamor kuom yudo Ohinga mar Jarito mar dwe ka dwe mogo mana mondo watigo e lendo! Watemuru kar nyalowa duto, mondo wang’e maber gik ma gasedno oting’o kendo tiyo kode chuth e tij lendo.