Lokruok Mabeyo Ahinya mag Mnara wa Mlinzi!
1 Dweche moko mosekalo e higani, ne oland wach moro maber ahinya ne kanyakla duto mantie: Chakre Januar 2008, Mnara wa Mlinzi nobed gi gocho ariyo mopogore, achiel nobed mar ji duto to machielo nobed mar Joneno mag Jehova! Nyalo bedo ni isebedo ka ipenjori niya: ‘Gasede ariyogi nobed mopogore e yo mane? Gin ber mage mabedoe kuom bedo gi gocho ariyo mopogore? Be nitie gik moko manyien ma wanyalo geno neno kuom gasedego?’
2 Pogruok Ma Nobedie: Gocho mar tarik achiel mar dwe ibiro luongo ni Gocho mar Ji Duto. Weche duto mayudore ei gasedni ibiro ndiki mondo okony ji duto. Gocho mar tarik 15 mar dwe ibiro luongo ni Gocho mar Puonjruok kendo ok bi chiwe e tij lendo. Obiro ting’o weche ma ibiro tiyogo e puonjruok mar Mnara wa Mlinzi e dwe achiel, kaachiel gi weche mamoko mabiro konyo Jokristo mosechiwore ne Jehova. Gocho mar Ji Duto mar Mnara wa Mlinzi ok bi moro mana Joneno kende somo, to moloyo obiro moro jogo ma ok gin Joneno to manyalo bedo ni nigi yie kuom Muma. Amkeni!, to podi ibiro ndiki mondo okony ji mopogore opogore, moting’o nyaka joma nigi kiawa kuom weche din koda jogo ma nie dinde ma ok luongore ni Jokristo.
3 Ber Mantie: E Gocho mar Puonjruok, lero tiend weche motigo kaka “painia” e yo ma jogo ma ok gin Joneno nyalo winjo, ok bi bedo gimochuno kendo. Gochoni bende nyalo ting’o weche ma ondiki ratiro moloyo ne Joneno mag Jehova kaachiel gi jopuonjre mag Muma matimo dongruok. To nade Gocho mar Ji Duto? Nikech weche moting’o koda kaka indikogi biro bedo makonyo ji duto, ng’at ma ok en Janeno biro bedo mamor somo gasedno duto. Kata kamano, Joneno mag Jehova bende biro yudo kony kuom somo gocho ka gocho mar gasedni. Nikech wabiro chiwo gocho mar Mnara achiel, kachiel gi Amkeni! achiel e tij lendo dwe ka dwe, wabiro bedo gi dwe mangima mar lony e weche ma watiyogo e chiwo gasede.
4 Gik Manyien: Gik moko manyien mabeyo ahinya biro bedo e Gocho mar Ji Duto mar Mnara wa Mlinzi. Achiel kuom gik manyien biro bedo weche mawuoyo e yo mayot kuom puonj michako ng’eyogo Muma. Wach moro biro nyiso kaka Muma nyalo konyo joot. Weche mitiyogo e puonjruok Muma ibiro chan ne rowere. Gocho ka gocho mar gasedni nobed gi weche malero ndiko moko mag Muma ma puonjowa kido mabeyo mag Jehova.
5 Walamo mondo Jehova ogwedh chenro manyienni mar Mnara wa Mlinzi. En gombo marwa ni gasedno kaachiel kod Amkeni! ochopne ji mang’eny mowinjore gi wach maber.—Math. 10:11.