Chakruok mar Gocho mar Dho Ingresa Mayot

CHAKRE gi gochoni mar puonjruok mar Ohinga mar Jarito, wamor mar landonu ni wabiro temo kuom higa achiel goyo gocho mar dho Ingresa mayot mabiro wuok kanyachiel kod mae dwe ka dwe. Obiro ting’o sula mag puonjruok, kendo ka thuolo nitie to ibiro medie sula mamoko. Wageno ni mano biro konyo ahinya Joneno mag Jehova mathoth e gero winjruokgi gi Jehova. Itimo kama nikech ang’o?

Dho Ingresa e dhok ma owete jotiyogo ahinya e pinje kaka Fiji, Ghana, Kenya, Liberia, Nigeria, Papua New Guinea, kod Solomon Islands. Kata obedo ni owete manie pinjegi wacho dhok mamoko mag anyuolagi, pile gijotiyo gi dho Ingresa e kanyakla, kata e tij lendo. Kata kamano, dho Ingresa ma gijotiyogo yot moloyo mano mitiyogo e bugewa. Bende, nitie Joneno moko mosedar modhi e pinje mamoko kama nyaka giti mana gi dho Ingresa kata obedo ni ok gilony e dhokno ahinya. E wi mano, dhi e chokruoge mag kanyakla mitimo e dhogi ok nyalrenegi.

Sula ma wahinyo nono juma ka juma e Puonjruok mar Ohinga mar Jarito, e yo maduong’ moloyo mitiyogo e konyowa siko ka wayudo chiemb chuny e kinde makare. Kuom mano, mondo jogo duto mabiro e chokruok oyud ber moloyo kuom weche mi puonjruok, ibiro go gocho mar dho Ingresa mayot moting’o weche mayot winjo. Gocho manyienni biro bedo gi kalatas ma toke mopogore. Wiye matindo, paragraf, penjo minwoyo bang’ puonjruok, kod pichni manie sula mag puonjruok biro bedo machal gi mago manie gocho ma wasebedo kwayudo. Omiyo, ji duto nyalo tiyo gi gocho moro amora kuomgi kendo chiwo paro e Puonjruok mar Ohinga mar Jarito. Mondo ine pogruok e weche mitiyogo e gocho ariyogo, ne ranyisi moket piny mogol e sula mokwongo mar puonjruok, paragraf mar 2 e gochoni mar dho Ingresa.

Wageno ni chenro manyienni biro dwoko lamo mag ji mang’eny mosebedo ka kwayo Jehova niya: “Imi weche odonjna, mondo apuonjra wecheni michiko.” (Zab. 119:73) Wan gadier ni jogo maok olony ahinya e dho Ingresa, kaachiel gi nyithindo moko ma dhogi en Ingresa, koro biro timo ikruok maber moloyo, ne Puonjruok mar Ohinga mar Jarito ma juma ka juma. Wadwoko ne Jehova erokamano ni kokalo kuom “hera ne riwruok duto mar owete,” otiyo gi “jatichno mogen, kendo mariek” e chiwo chiemb chuny mogundho.​​—⁠1 Pet. 2:⁠17, New World Translation; Math. 24:45.

Bura Maduong’ mar Joneno mag Jehova