Ti gi Trakt e Lando Wach Maber
1. Jotich Nyasaye osebedo ka tiyo nade gi trakt?
1 Jotich Jehova osetiyo gi trakt malero Muma kuom higini mang’eny e lando wach maber. E higa mar 1880, C. T. Russell gi joma ne riwore kode nochako loso trakt ma niluongo ni Bible Students’ Tracts (ma bang’e niluongo ni Old Theology Quarterly), kendo ne gichiwogi ne joma nohero somo Ohinga mar Jarito mondo opog ne jomamoko. Ne gihero tiyo gi trakt ahinya ma kata kane C. T. Russell oloso riwruok maok mar ohala e higa 1884 mondo otigo e lando weche mag Pinyruoth, noket nying mar “tract” e nying riwruogno ma ne en Zion’s Watch Tower Tract Society, ma sani iluongo ni Watch Tower Bible and Tract Society of Pennsylvania. Kane ochopo higa 1918, noyudo Jopuonjre Muma osepogo ne ji trakt mokalo milion 300. Nyaka e kindegi, trakt pod itiyogo ahinya e lendo.
2. Ang’o momiyo lendo gi trakt ok tek?
2 Gimomiyo Lendo gi Tract Kelo Nyak: Trakt beyo kendo mako wang’. Giting’o weche machuok manyalo lombo ng’ato kendo ma nigi puonj. Ginyalo moro weg udi maneno ni somo gasede kata buge ok yotnegi. Jolendo manyien gi nyithindo bende nyalo chiwogi e yo mayot. E wi mago, trakt tindo kendo ting’ogi yot.
3. Wuo ane kuom wach moro mosene ming’eyo kata manie bugewa manyiso ni tiyo gi trakt nyalo kelo nyak.
3 Ji mang’eny kwongo winjo adiera kokalo kuom trakt. Kuom ranyisi, e piny Haiti, dhako moro noneno trakt kobol e wang’ yo. Nokwanye, kae to osome, mi okok niya, “Ayudo adiera! ” Bang’e, nodhi e Od Romo, nochako puonjore Muma, mi obatise, to magi duto notimore mana nikech teko mar Wach Nyasaye mondik e trakt.
4. Gima duong’ ma wadwaro chopo e dwe ma watiyoe gi trakt en ang’o?
4 Sama Ilendo Ot ka Ot: Nikech tiyo gi trakt kelo nyak e lendo, wabiro tiyo kodgi kinde ka kinde kaka buge milendogo e dwe kochakore gi Novemba. Gima duong’ ma wadwaro chopo ok en mana miyo amiya ji trakt, to wadwaro tiyo gi traktgo e chako wuoyo gi ji. Ka ng’ato oyie winjowa e limbe mokwongo kata sama wadok lime, wanyalo nyise kaka wajatimo puonjruok mar Muma gi ji ka watiyo gi bug Muma Puonjo kata buk machielo mar puonjruok. Ere kaka wanyalo chiwo trakt sama walendo e ot ka ot? Trakt ka trakt oting’o weche mopogore opogore, omiyo onego wang’e gima trakt ma wadwaro chiwo wuoye.
5. Wanyalo tiyo gi yore mage e chiwo trakt sama walendo ot ka ot?
5 Yo ma wachiwogo trakt onego oluwre gi alwora ma walende kod weche manie traktno. Wanyalo chako gi miyo wuon ot trakt. Weche manie ng’e trakt nyalo more. Bende wanyalo tang’o ne wuon ot trakt mabuora kae to en owuon ema oyier ma more. Sama walendo e alwora ma ji oluor yawoe dhoudi ne joma welo, wanyalo ting’o trakt e yo ma wuon ot nyalo nene maber, kata wanyalo kwaye mondo wasonego e bwo dhoot mondo ochiwie pache. Ka wi traktno ondik e yor penjo, wanyalo kwaye mondo ochiw pache e wi penjono. To bende ka wahero, wanyalo penje penjo moro amora ma waneno ni nyalo mako pache kata miyo owuo kodwa. Kae to wanyalo somo ne wuon ot kamoro e traktno, ka waling’ matin kama nitie penjo moro kendo gwele mondo ochiw pache. Wanyalo somo ndiko majiwo weche madongo achiel kachiel e Muma. Bang’ ka wasenono kuonde moko e traktno, wanyalo tieko mbaka kendo timo chenro mar dok lime. Kapo ni kanyaklawa weyoga buge kuonde ma ji ok yudre e utegi, wanyalo weyo ne weg udi trakt kuonde ma joma kalo ok nyal nenogie.
6. Ere kaka wanyalo tiyo gi trakt sama walendo e yore?
6 Sama Ilendo e Yore: Be isetiyo gi trakt sama ilendo e yore? Moko kuom joma kadho reto kendo ok digiher chung’ mondo wawuo kodgi. Samoro ok yot ng’eyo gima nyalo morogi. Kar miyogi gasede manyien to ok wang’eyo kabe gibiro somogi, donge nyalo bedo maber ka wamiyogi trakt? Nikech ng’e traktgo beyo kendo giting’o weche machuok, ji nyalo bedo gi siso mar somogi sama giyudo thuolo moro matin. Kata kamano, ka ok gidich ahinya, wanyalo wuoyo kodgi e wi trakt ma wamiyogino.
7. Wuo ane kuom weche moko mosene manyiso kaka wanyalo tiyo gi trakt sama ok wan e tij lendo.
7 Sama Ok In e Tij Lendo: Yot tiyo gi trakt e chiwo neno sama ok wan e tij lendo. Owadwa moro jating’o trakt moko seche duto mowuok pacho. Sama oromo gi ng’ato, kaka jauso, onyise ni doher miye gimoro mondo osom kae to omiye trakt. Kane owadwa gi nyaminwa moro mokendore dhi bayo e dala mar New York, ne giparo chon ni ne ginyalo romo gi ji mowuok e pinje mopogore opogore. Omiyo ne giting’o bug Nations kaachiel gi trakt mogwaro e dhok mopogore opogore. Kae to, kane giwinjo ka jauso moro wacho dhok mawendo e bath yo kata e dho kuonde michieme, ne gimiye trakt mondik gi dhok mowachono.
8. Ang’o momiyo inyalo por trakt gi kodhi?
8 ‘Chwo Kodhi’: Inyalo por trakt gi kodhi. Jopur chwowo kodhi modhuro nikech ok ging’eyo ni mage kuomgi ma biro twi mi dongi. Eklesiastes 11:6 wacho kama: ‘Chwo kodhi ma in-go gokinyi, kendo kik igeng’ lweti godhiambo, nimar ikiya gima biro bedo maber, kata mano kata macha, kata giduto gibiro bedo mabeyo.’ Kuom mano, wadhiuru nyime chwowo kodhi modhuro ka watiyo gi trakt mondo ‘wami ng’eyo olandre.’—Nge. 15:7.
[Blab e ite mar 3]
Nikech tiyo gi trakt kelo nyak e lendo, wabiro tiyo kodgi kinde ka kinde kaka buge milendogo e dwe kochakore gi Novemba