Trakt Manyien Molos e Yo Malombo Wang’!
1. Gin gige lendo mage ma olos e yo manyien kendo malombo wang’?
1 Ne ogol trakt abich manyien e Chokruog-Distrikt ma higa 2013, ma wiye ne wacho ni “Wach Nyasaye En Adiera! ” E wi mano, Wach Pinyruoth Na. 38, ma wiye wacho ni “Be Jomotho Chieng’ Nobed Mangima Kendo?” osemed e wi abich ma nokwong golgo. Trakt auchielgo duto olos e yo manyien kendo malombo wang’. Ang’o momiyo olosgi e yo machalo kamano? Ere kaka wanyalo tiyo maber gi yo manyien molosgigono sama walendo ot ka ot?
2. Ang’o momiyo olos traktgo e yo manyien kamano?
2 Gimomiyo Olosgi e Yo Machalo Kamano: Yo maber mar chako lendo ot ka ot en tiyo gi okenge ang’wen maluwogi: (1) Ti gi penjo mondo imi wuon ot thuolo mar wacho gima oparo. (2) Som kode Ndiko majiwo wach ma uwuoyoe. (3) Mi wuon ot buk moro mondo osom. (4) Penje penjo moro ma ubiro wuoyoe e limbe maluwo, kendo itim chenro mar dok lime. Yo manyien molosgo traktgo konyowa tiyo gi yore ang’wen-go duto e yo mayot.
3. Ere kaka wanyalo chiwo trakt manyien-go sama wan e tij lendo?
3 Kaka Wanyalo Tiyo Kodgi: (1) Bang’ moso wuon ot, nyise penjo moket e nyim trakt, kae to ikwaye mondo owach dwoko ma dochiw kuom adek moket e bwo penjono. (2) El trakt, kae to inon kode kama wacho ni “Dwoko ma Muma Chiwo.” Som ndiko man kanyo e Muma achiel kachiel kapo ni nyalore. Ka wuon ot nigi thuolo, to unyalo wuoyo e wi wich ma wacho ni “Kaka Wachno Nyalo Konyi.” (3) Chiw traktno, kendo ijiw wuon ot mondo osom kuonde mamoko e thuolone owuon. (4) Kapok iwuok, nyise penjo mayudore e tok traktno e bwo wich ma wacho ni “Tem Ane Dwoko Penjoni,” kae to itim chenro mar dok nono dwoko ma Muma chiwo e wi penjono.
4. Ere kaka wanyalo tiyo gi trakt manyien-go sama wadok timo limbe?
4 Dok timo limbe bende ok tek. Ti gi ndiko man tiere e tok trakt e dwoko penjo ma ne iweyo ne wuon ot e limbe mokwongo. Kapok iwuok, nyis wuon ot picha mar brosua mar Wach Maber moket e tok traktno, kae to ielne sula malero wach ma uwuoyoe e okang’ momedore, bang’e wene brosuano. Ka oyie kawe, to itim chenro mar dok nono kode brosuano e limbe maluwo. Ka itimo kamano, to isemana chako puonjruok Muma! Kata ka ok ichiwo brosuano, to inyalo chiwo trakt machielo mopogore gi mano kae to itim chenro mar dok none gi wuon ot e limbe maluwo.
5. Ere kaka trakt osebedo ka konyowa e tijwa mar lendo?
5 Wasebedo ka watiyo gi trakt e tij lendo kuom higini mokalo 130. Kata obedo ni lachgi kod kaka ilosogi ema osebedo ka pogore, gisekelonwa nyak ahinya e tij lendo. Wadhiuru nyime tiyo maber gi trakt molosnwa e yo makendegi e lando adiera mag Muma e piny mangima.—Nge. 15:7a.