Kaka Wanyalo Tiyo gi Brosua Manyien mar Gin Jomage Matimo Dwaro mar Jehova e Kindegi?
Olose Mondo Wakonygo Jopuonjre Muma Ong’e Riwruokwa
1. Gin gik mage adek ma brosua manyienni konyowa chopo?
1 Be isechako tiyo gi brosua manyien mar Gin Jomage Matimo Dwaro mar Jehova e Kindegi? Olose mondo wati kode e konyo jopuonjre Muma mondo (1) ging’ewa maber kaka Joneno mag Jehova, (2) ging’e tije mwatimo, kendo (3) ging’e kaka riwruokwa tiyo. Brosua manyienni miluongo e yo machuok ni Dwaro mar Jehova nigi sula machieko chieko makawo ite achiel kende, kendo minyalo non kuom dakika abich kata apar bang’ tieko puonjruok.
2. Ler ane kaka i brosuani chalo.
2 Kaka Iye Chalo: Brosuani opog e kidienje adek, kendo moro ka moro kuom kidienjego wuoyo kuom wach moro e wi riwruok mar oganda Jehova. Sula 28 duto mag brosuani oket e yor penjo, kendo wiye matindo manie bwo sulago ema chiwo dwoko mag penjogo. Pichni mag pinje mokalo 50 bende oketi, manyiso maler ni tijwa itimo e piny ngima. Sula moko nigi sanduk mawacho ni “Yud Weche Momedore,” moting’o paro moko ma inyalo jiwo japuonjreni mondo otigo.
3. Ere kaka wanyalo tiyo gi brosua mar Dwaro mar Jehova?
3 Kaka Inyalo Tiyo Kode: Nyis japuonjre Muma wi sula moketi e yor penjo. Kae to sama udhi nyime gi nono sulano, jiw wiye matindo manie bwo sulano. Sama utieko, nonuru penjo moket e giko sulano, ma gin mag nwoyo weche musepuonjoru. Unyalo yiero mar somo sula mangima komondi eka uwuoye, kata unyalo none e kidienje. Yier ndiko monego usom. Kik uwe maok uwuoyo e wi pichni kaachiel gi sanduk mar “Yud Weche Momedore.” Kinde mang’eny, ber nono sulago kuluwo kaka ochan-gi. Kata kamano, ok rach chikruok e sula machielo ka mano dwarore. Kuom ranyisi, kapo ni chokruog-distrikt kata mar alwora okayo, unyalo chikoru nyaka e sula mar 11.
4. Ang’o momiyo imor gi brosua manyienni?
4 Sama wapuonjore Muma gi ng’ato, wakonye mondo ong’e Wuonwa me polo. Kata kamano, dwarore ni wakonye mondo ong’e riwruok mar oganda Jehova bende. (Nge. 6:20) To mano kaka wamor ni wan-gi brosua manyienni ma miyo timo mano bedo mayot!