Gin Jomage Matimo Dwaro mar Jehova e Kindegi?
1. En karang’o ma wabiro chako puonjoree brosua mar Gin Jomage Matimo Dwaro mar Jehova e Kindegi?, to ere kaka timo mano biro konyowa?
1 Kochakore gi juma mar Oktoba 28, 2013, wabiro tiyo gi brosua mar Gin Jomage Matimo Dwaro mar Jehova e Kindegi? e Puonjruok Muma e Kanyakla. Brosuano ma ne wayudo e chokruog-distrikt mar “Rit Chunyi!” olosi mondo wakonygo jopuonjre Muma ong’e riwruokwa. Puonjruok brosuano biro miyo wane ber mar bedo e riwruok mar oganda Jehova. E wi mano, none biro konyowa ng’eyo kaka wanyalo tiyo kode maber e tij lendo.—Zab. 48:13.
2. En yo mane ma wabiro nonogo brosuano e Puonjruok Muma e Kanyakla?
2 Kaka Wabiro Puonjore Brosuano: Jal matayo puonjruok onego opog dakika mag puonjruok maber mondo sula ka sula oyud thuolo moromo. Sama ichako non sula ka sula, jal matayono biro somo wi sulano. Kae to, obiro kwayo jasomo mondo osom paragraf mokwongo. Bang’e, obiro penjo jowinjo penjo ma oiko ne paragrafno. Bang’ mano, wiye matindo onego osom kendo owuo kuomgi kigin. Owadwa matayo biro kwayo jowinjo mondo ochiw paro kuom kaka weche moler e bwo wiyego konyo e dwoko penjo ma bende e wi sulano. Brosuani bende nigi pichni mang’eny ma inyalo wuo kuomgi. Ndiko masiro puonj madongo onego osom kaluwore gi thuolo ma nitie. Ka pok ochak sula maluwo, jal matayo puonjruok onego onwo puonj madongo ka otiyo gi penjo mayudore e giko sulano. Ka nitie sanduk mawacho ni “Yud Weche Momedore,” obiro kwayo jasomo mondo osom sandugno kae to ogwelo jowinjo mondo ochiw paro kuom kaka jopuonjre Muma nyalo yudo ber ka gitiyo gi parogo. Ka pod nitie thuolo modong’ e giko mar puonjruok, jal matayo nyalo tiyo gi wiye sulago e nwoyo puonj madongo. Ng’euru ni ok ochuno ni wati gi yorni sama watiyo gi brosuano e tayo puonjruok mag Muma ka wan e tij lendo.
3. Mondo wayud puonj gi jip sama wabiro nono brosuano, ang’o monego watim?
3 Mondo iyud puonj gi jip, ikri maber kapok idhi e chokruok. Tem matek mondo in bende ichiw paro. Sama puonjruok dhi nyime, tem paro kaka wechego nyalo konyo jopuonjre mag Muma. Wageno ni puonjruok brosuani biro ikowa maber ne konyo jomamoko bende mondo giriwre kodwa e timo dwaro mar Nyasaye mondo gin bende gibed gi geno mar dak nyaka chieng’.—1 Joh. 2:17.