Owinjore gi Ng’a?
1. Sama wasomo Ohinga mar Jarito kata Amkeni! en ang’o monego wanon, to nikech ang’o?
1 Gasede mag Ohinga mar Jarito kod Amkeni! igoyo mondo okony ji mopogore opogore e piny mangima. Mano e momiyo sula manie gasedego bende wuoyo kuom weche mopogore opogore. Omiyo, sama wasomo sulago, ber ka wanono ni ginyalo konyo jomage, kae to watim chenro mar teronegi.
2. Gin weche kaka mage ma gasedewa wuoyega manyalo moro ji?
2 Be dibed ni Ohinga mar Jarito ma un-go sani lero wach moro ma ne isewuoye gi jal moro ma utiyogo? Be nitie sula moro mawuoyo kuom ngima joot manyalo konyo watni moro? Dibed ni osiepni moro chano dhi e piny moro ma Amkeni! osewuoye? Be wach ma iwuoye e achiel kuom gasedego nyalo moro jo ohala kata joma tiyo e riwruoge mag sirkal e alworau? Gaset mawuoyo kuom pek ma joma oti kaloe nyalo bedo maber ahinya gi kuonde miritoe joma hikgi oniang’. Joma rito kuwe bende nyalo hero somo gasede mawuoyo kuom mahundu.
3. Ler ane weche moko mosetimore manyiso ni chiwo gasedewa kaluwore gi joma owinjore kodgi nyalo kelo nyak.
3 Nyak: Bang’ ka owadwa gi nyaminwa moro e piny South Africa noyudo Amkeni! ma Oktoba 2011 ma ne wuoyo kuom “Kuwalea Watoto Wenye Kutegemeka,” ne gigoyo simo ne skunde 25 manie alwora ma kanyaklagi lendoe mondo gipenjgi kabe ginyalo hero gasedego. Skunde 22 noyie kawo gasedego kendo miyo jopuonjre. E piny Suoth Africa achiel achielno, owadwa gi nyaminwa moro bende notero gasedego e skunde manie alworagi. Jopuonj manie achiel kuom skundego noyiero mar tiyo gi gasedego e puonjo nyithindo. Owadwa gi nyaminwano nopimo ne jarit-alwora moro wachno mi jarit-alworano nojiwo kanyakla manie alwora molimo mondo openj skunde manie alworagi kabe ginyalo hero gasedego. Ofis manie pinyno noyudo kwayo mang’eny ahinya mag gasedego ma nochuno ni gigo gasedego momedore!
4. Ang’o momiyo dwarore ni wachiw gasedewa ne ji mang’eny kaka nyalore?
4 Gasedewa konyowa ng’eyo tiend gik matimore e piny kaluwore gi weche ma nokor e Muma kendo gipuonjowa e wi Pinyruodh Nyasaye. Gin kende e gasede “malando wach resruok.” (Isa. 52:7) Omiyo, dwarore ni wachiwgi ne ji mang’eny kaka nyalore. Yo maber mar timo mano sama wayudo gaset moro en nono ni to, ‘Owinjore gi ng’a?’