Tero Gasedewa ne Joma Ohero Somogi Nyalo Miyo Wayud Jopuonjre Muma
1. Ang’o momiyo riwruok mar oganda Jehova osebedo ka jiwo jolendo mondo oterga gasedewa ne joma ohero somogi, kata ka jogo ok oikore puonjore Muma?
1 Nitie ji mang’eny mohero somo gasedewa, kata obedo ni ok giikore puonjore Muma kodwa. Riwruok mar oganda Jehova osebedo ka jiwo jolendo mondo oterga gasede ne joma kamago dwe ka dwe. Kinde mang’eny, joma ohero somo gasedewa mosmos chakoga bedo gi siso mar ng’eyo Wach Nyasaye e yo momedore. (1 Pet. 2:2) Chieng’ moro ginyalo po mana ka wach moro omulo chunygi, mi giyie puonjore Muma kodwa.
2. Ere kaka wanyalo olo pi ne kodhi ma wachwoyo e chuny joma wateronegiga gasedewa?
2 ‘Ol Pi’ ne Kodhi mag Adiera: Kar miyo amiya joma kamago gasede kae to wamako wuoth, donge wanyalo goyo kodgi mbaka machuok mondo ging’i kodwa? Timo mano biro miyo wang’e kit ngima ma gidakie, gik ma gihero, kod gik ma giyiego, kae to watiyo gi rieko sama wawuoyo kodgi. (Nge. 16:23) Onego waikre maber ne limbe ka limbe. Ka nyalore, wanyalo dhi nyime olo pi ne kodhi ma wasechwoyo e chunygi kuom wuoyo machuok e wi wach moro kod ndiko motudore kode e achiel kuom gasede ma wateronegi. (1 Kor. 3:6) Kinde duto ma walimo ng’at ma kamano, onego wandik gaset ma wamiye, wich ma wawuoye, kod ndiko ma wasomone.
3. Onego walim joma wateronegiga gasede nyadidi e dwe?
3 Onego Walimgi Nyadidi? Onego walimgi dichiel e dwe sama wateronegi gasede manyien. Kata kamano, nikech ji opogore opogore, to okang’ ma giherogo gasedewa bende opogore, nitie moko kuomgi ma wanyalo limo nyadinwoya e dwe achiel. Kuom ranyisi, ka juma achiel kata jumbe ariyo osekalo bang’ tero ne ng’ato gasede, inyalo dok lime kae to iwacho ni, “Arawo mana matin mondo anyisie wach moro e gasede ma nyocha aweyonika.” Mano biro miye siso mar somo wachno. Ka ifwenyo ni osesome, inyalo penje paro ma en-go e wi wachno, kae to inon kode wachno machuok. To ka jal ma wamiyoga gasedeno ohero somo bugewa mamoko bende, wanyalo dok lime e kor dwe mondo wamiye trakt, brosua, kata buk moro amora ma walendogo e dweno.
4. Ang’o ma wanyalo timo kinde ka kinde mondo watem kabe joma wateronegiga gasede nyalo yie puonjore Muma?
4 Kik irit mondo wuon ot ema chieng’ moro opoyi ni doher puonjore Muma. Kar mano, kaw okang’ mar temo chako puonjruok kode. Kata kapo ni osebedo kotamore puonjruok, kinde ka kinde, tem tiyo gi sula mag “Dwoko Penjo mag Muma” mayudore e Ohinga mar Jarito, dipo koyie puonjore. Wanyalo kata temo puonjore kode mana gie dhoot. To kata kapo ni otamore puonjruok chuth-chuth to pod ohero somo gasedewa, pod wanyalo mana dhi nyime terone gasede.