Luw Ranyisi mar Jonabi—Zefania
1. Zefania notiyo kaka janabi e chal mane, to ere kaka ranyisine maber nyalo konyowa e ndalogi?
1 E higni mag 659 nyaka 629 Ka Ndalowa Podi, Jo-Yahudi ma nodak Juda ne lamo Baal ayanga maonge luoro moro amora. Noyudo eka oneg Ruoth Amon, ma ne en ruoth marach, kendo Josia ema koro ne locho kaka ruoth. (2 Weche 33:21–34:1) Kindeno ema Jehova nooroe Zefania mondo oland ote mar Jehova mar ng’ado bura. Kata obedo ni Zefania ne en achiel kuom anyuola mar dhood Juda, nolando ote mag Jehova gi chir kowacho ratiro kaka Jehova ne dhi kumo jotend Juda ma ne timo timbe ma ok kare. (Zef. 1:1; 3:1-4) Mana kaka Zefania, wan bende watemo bedo gi chir ma ok wayie mondo wedewa odwok chien kinda ma watiyogo ne Jehova. (Math. 10:34-37) Zefania nolando ote mane, to weche nobedo nade bang’e?
2. En ang’o ma nyaka watim mondo watony e chieng’ mirimb Jehova?
2 Dwar Jehova: Jehova kende ema nyalo reso ji e odiechieng’ mar mirimbe. To mano e momiyo Zefania nosayo Jo-Yahudi wetene ma nodak Juda mondo odwar Jehova, odwar tim makare, kendo odwar muolo ka thuolo pod ne nitie. (Zef. 2:2, 3) Mano e gima dwarore ni ji otim e ndalowagi bende. Nikech wan bende wajiwo jomamoko mondo odwar Jehova mana kaka Zefania notimo, wan be nyaka watim kinda mondo kik ‘wadog chien mi wawe luwo Jehova.’ (Zef. 1:6) Kar dok chien, wadwaro Jehova kuom puonjore Muma gi kinda kendo kwayo Jehova mondo otawa. Wadwaro tim makare ka wadak e ngima maler. Wadwaro muolo ka wabolore kendo waikore luwo kaka riwruok mar oganda Jehova chikowa.
3. Ang’o momiyo onego wasik ka wan gi paro mowinjore sama wan e tij lendo?
3 Nyak Mabeyo: Ote ma Zefania ne lando nomiyo Jo-Juda moko ma chunygi ne nikare nochako dwaro Jehova, to ahinya ahinya Josia, ma nochako manyo Jehova ka pod ne en mana wuoyi matin. Josia bang’e nokedo matek mondo otiek lamo mar nyiseche manono e piny Juda gi Jerusalem. (2 Weche 34:2-5) E kindegi bende, kata obedo ni kodhi mag Pinyruoth nyalo lwar e dir yo, e lwanda, kata e kudho, pod nitie kodhi malwar e lowo maber kendo nyak. (Math. 13:18-23) Wan gadier ni Jehova biro dhi nyime guedho kinda ma waketo e miyo kodhi mag Pinyruoth olandre.—Zab. 126:6.
4. Ang’o momiyo onego wadhi nyime ‘rito Jehova’?
4 Jomoko ma nodak Juda ne paro ni Jehova ne ok dhi kawo okang’ moro amora. Kata kamano, Jehova to nosingo ni odiechienge maduong’ ne chiegni. (Zef. 1:12, 14) Mana jogo ma noketo genogi kuome kende ema ne dhi tony. (Zef. 3:12, 17) Nikech wan bende wadhi nyime ‘rito Jehova,’ wang’aduru mar siko ka watiyone gi mor kendo kaka joge manie riwruok achiel mar ogandane!—Zef. 3:8, 9.