Josia ne Nigi Osiepe Mabeyo

Be iparo ni timo gik makare en gima yot?— Thoth ji neno ni timo gik makare ok yot. Muma nyisowa ni ne ok yot kata matin ne wuowi moro matin miluongo ni Josia otim gik makare. Kata kamano, ne en gi osiepe mabeyo ma ne okonye timo gik makare. We wapuonjre e wi Josia kod osiepene.

Wuon Josia ne en ruodh Juda kendo ne iluonge ni Amon. Amon ne en ng’at marach ahinya kendo ne olamo nyiseche manono. Kane ruoth Amon otho, Josia wuode ne obedo ruodh Juda. Kata kamano, Josia ne en mana jahigni aboro kende! Be ne en ruoth marach kaka wuon mare?— Ooyo, Josia ne en ng’at maber!

Kata mana kinde ma ne Josia pod tin ahinya, ne odwaro timo dwach Jehova. Omiyo ne oyiero mana osiepe mohero Jehova. Kendo osiepenego ne okonye timo gik makare. Moko kuom osiepe Josia ne gin ng’a gini?

Achiel kuom osiepene ne en janabi Zefania. Zefania ne osiemo Jo-Juda ni masiche ne dhi yudogi ka gilamo nyiseche manono. Josia ne owinjo Zefania kendo ne olamo Jehova, to ok nyiseche manono.

Osiep Josia machielo ne en Jeremia. Josia gi Jeremia ne gin mbese, kendo ne gidak machiegni kane gidongo. Ne gin osiepe moherore ahinya ma kane Josia otho Jeremia ne ondiko wer ma ne oywagogo Josia konyiso kaka ne ohere. Jeremia gi Josia ne konyore timo gik makare kendo timo dwach Jehova.

Ranyisi mar Josia nyalo puonji ang’o?— Kata kane Josia pod en wuowi matin, ne odwaro timo gik makare. Nong’eyo ni ne onego omak osiep mana gi joma ohero Jehova. In be tem ahinya yiero mana osiepe mohero Jehova kendo manyalo konyi timo gik makare.