Josia Nohero Chike Nyasaye

Josia ne obedo ruodh Juda ka ne en jahigni aboro. E ndalogo, ji nohero timbe juok, kendo ne gilamo sanamu. Ka ne Josia jahigni 16, ne otemo puonjore kaka nonyalo lamo Jehova e yo ma Jehova oyiego. Ka ne ojahigni 20, nochako ketho sanamu ma ji ne lamo, kod kendo mag misango ma ne gitiyogo. Ka ne ochopo jahigni 26, ne otimo chenro mondo olos kuonde ma ne okethore e hekalu mar Jehova.

Ka ne iloso kuonde ma nokethore e hekalu, Hilkia jadolo maduong’ noyudo buk modol ma noting’o Chike Jehova, ma samoro Musa owuon e ma nondiko. Shafan ma ne en jandiko mar ruoth nodhi gi bugno ir Josia, kendo nochako some ne Josia gi dwol maduong’. Sama Josia ne owinjo kisomo wechego, ne ofwenyo ni kare ji ne osebedo ka timo gik ma Jehova nokwero kuom higni mang’eny. Ruoth Josia nonyiso Hilkia kama: ‘Nyaka bed ni Jehova ok mor kodwa. Dhi ipenj Jehova wach, mondo onyiswa gima onego watim.’ Hilkia notimo kamano. Jehova nochiwo dwoko kokalo kuom janabi moro ma dhako ma ne nyinge Hulda. Dwokono ne wacho kama: ‘Jo-Juda oseweya. Gibiro yudo kum mager, to ok ka Josia pod en ruoth, nikech Josia en ng’at mobolore.’

Ka ne Ruoth Josia owinjo wach ma ne Jehova owacho, ne odhi e hekalu mi oluongo Jo-Juda duto kanyachiel. Kae to nosomo ne ji Chike Jehova gi dwol maduong’. Josia gi ji duto ne osingore ni ne gidhi luwo Chike Jehova gi chunygi duto.

E kindeno, Jo-Juda ne osebare ne timo nyasi mar Pasaka kuom higni mang’eny. To ka ne Josia osomo e Chike Jehova ni ne onego gitim Pasaka higa ka higa, nojiwogi kama: ‘Wabiro timo ne Jehova Pasaka.’ Kae to Josia noloso chenro mondo chiw misengini, kendo nochano mondo jower mang’eny obi e hekalu. Kae to ne gitimo nyasi mar Pasaka. Bang’ mano, ne giluwe gi Sawo mar Makate ma Ok Oketie Thowi kata yeast. Sawono nokawo ndalo abiriyo. Nyasi mar Pasaka ma kamano pok nobedoega chakre ndalo Samuel. Kuom adier, Josia nohero Jehova kod chikene. To nade in? Be imor puonjori e wi Jehova?