Jehova Nena Kaka Ng’at ma Chalo Nade?
1. Ang’o momiyo inyalo pim Muma gi kio?
1 Ing’iyoriga e kio nyadidi? Thothwa timoga mano pile mondo okonywa fwenyo kuonde monego walos e dendwa. Muma bende ipimo gi kio kata rang’i. Somo Wach Nyasaye konyowa neno kitwa ma iye ma be e ma Jehova ng’iyo. (1 Sam. 16:7; Jak. 1:22-24) Wach Nyasaye nigi nyalo mar fwenyo “paro kod dwaro manie chuny ng’ato.” (Hib. 4:12) Ere kaka somo Muma pile kendo paro matut kuom gik ma wasomo nyalo konyowa fwenyo kuonde monego watimie dongruok mondo wamed bedo jolendo ma nigi nyak?—Zab. 1:1-3.
2. Ere kaka Muma nyalo konyowa nonore wawegi?
2 Ti gi Muma Kaka Kio: Weche mondik e Muma kuom jotich Jehova machon konyowa fwenyo kido ma Jehova morgo. Kuom ranyisi, Daudi ne nigi kinda e neno ni nying Nyasaye ok oketh. (1 Sam. 17:45, 46) Isaya ne ochiwore lendo gi chir e alwora ma ji mang’eny ne ok winjie wach ma ne olando. (Isa. 6:8, 9) Nikech Yesu nohero Wuon-gi me polo ahinya, mano nomiyo oneno tij Wuon-gi kaka tich ma kelo mor kendo ma duogo chuny, to ok tich michunruokgo. (Joh. 4:34) Jokristo mokwongo nolendo gi kinda, ne gigeno kuom Jehova, kendo ne giikore dhi nyime gi lendo ma ok giweyo. (Tich 5:41, 42; 2 Kor. 4:1; 2 Tim. 4:17) Sama waparo matut kuom ranyisi kaka mago, wayudo thuolo mar nonore wawegi kuonde ma wanyalo timoe dongruok e tijwa.
3. Ang’o momiyo onego watim lokruok madwarore mapiyo kaka nyalore?
3 Los Kuonde Monego Orie: Ng’at ma ng’iyore e kio kae to ok orie kuonde madwarore timo nono. Onego wakwa Jehova mondo okonywa wanonre maber sama wasomo Muma kendo watim lokruoge madwarore. (Zab. 139:23, 24; Luka 11:13) Nikech ndalo modong’ nok, onego warie mapiyo kaka nyalore kuonde madwarore ni orie, mondo wares ngimawa kod ngima mag jomamoko.—1 Kor. 7:29; 1 Tim. 4:16.
4. Ng’at ma ng’iyore e Wach Nyasaye kae to rieyo kuonde madwarore ni orie yudo ber mage?
4 Kata obedo ni kitwa ma oko bende onego obed maber, kitwa ma iye ema Jehova neno kaka gima duong’. (1 Pet. 3:3, 4) Ng’at ma ng’iyore e Wach Nyasaye kae to rieyo kuonde madwarore ni orie yudo ber mage? En ‘ok obed ng’at ma winjo wach kae to wiye wilgo,’ kar mano “en jatim tich” kendo oyudo mor kod gueth e tije. (Jak. 1:25) Kuom adier, wabiro siko ka wamor kendo bedo gi nyak e tijwa ka wadhi nyime miyo duong’ mar Jehova onenre e ngimawa.—2 Kor. 3:18.