Wende Manyien mag Pako Jehova!
1 Romo mar Watch Tower Bible and Tract Society of Pennsylvania ma itimoga higa ka higa nyocha otim Oktoba 4, 2014. E romono, ne oland ni osetim chenro mar timo lokruoge moko e bugwa mar wer. To mano kaka ji ne mor gi wachno! Ne opar ne joma ne nie romono ni wendewa mag Pinyruoth omako kama duong’ e lamo marwa.—Zab. 96:2.
2 Samoro inyalo penjori ni to, ‘Ang’o momiyo itimo lokruok ne bugwa mar wer?’ Nitie gik momiyo. Mokwongo, nikech wamedo winjo tiend Ndiko e yo maler, mano nyalo dwaro ni olok weche moko e wendewa. (Nge. 4:18) Mar ariyo en ni weche mang’eny motigo e bug wer masani ne owuok e Loko mar Piny Manyien ma 1984 mar English. Dwarore ni olok weche ma kamago mondo oluwre gi loko ma 2013. To nikech timo lokruogego ok en tich matin, ne ong’ad ni omed wende mamoko e bug wer.
3 Be biro chuno ni warit nyaka go bug wer manyien mondo eka wachak tiyo gi wende manyien-go? Ooyo. Wamor landonu ni e dweche maluwo, ibiro ket wende manyien mogwaro e Wesaitwa mar jw.org. Sama wer moro manyien oikore, ibiro kete mondo owere kaka wer mogik e Chokruok mar Tijwa, kiluonge ni “wer manyien.”
4 Kaka Wanyalo Puonjore Wero Wende Manyien-go: Puonjruok wer manyien samoro ok yotga. Kata kamano, mana kaka jandik-zaburi, wan be wadwaro ni wawer gi dwol e chokruogewa ‘mak waling’.” (Zab. 30:12) Inyalo luwo weche maluwogi mondo ipuonjri wende manyien-go e yo mayot.
Nikech ibiro ketga thumbe piano mag wende manyien e Websaitwa, winjgi nyadinwoya. Kaka imedo winjo thumbego e kaka ibiro medo makogi e yo mayot.
Som weche mag wer mipuonjori kendo item makogi gi wiyi.
Luwri gi thum sama iwero wendno. Tim kamano nyaka chop kama ing’eyo wendno maber.
Weruru wende manyien-go sama utimo Lamo mar Joot, nyaka chop kama koro unyalo werogi mayom.
5 E dweche mabiro, sama wer mogik e Chokruok mar Tijwa en wer manyien, ibiro ketne kanyakla thum matayo wendno mondo gikwong giwinje dichiel. Kae to jowinjo biro were ka giluwre gi thum mana kaka wajotimo sama wawero wende mamoko.
6 Wer e chokruogewa miyowa thuolo mar riwo dwondwa kanyachiel mondo wapak Jehova gi mor. Omiyo, ok onego wabed gi tim mar wuok oko ka ok ochuno sama ji dwa wer e chokruogewa mag Jokristo.
7 Nitie yo machielo ma bende wanyalo nyisogo ni wamor gi wendewa mag pako Nyasaye. Sama wan e chokruogewa mag alwora kod mag ndalo adek, nitierega dakika matin kapok twege ochakore miketonwaega thum mondo wawinji. Ber ng’eyo ni diriyo e higa, owetewa gi nyiminewa mochiwore wuokga kuonde mopogore opogore e piny mangima, kendo gichulo pes wuoth giwegi mondo gidhi Patterson, New York, mondo gilos thumbe mamit mitiyogo e lamo Jehova. Omiyo sama jakom okwayowa ni wabed e kombewa mondo wawinj thum molosnwa, onego watim kamano. Timo kamano biro konyowa iko chunywa mondo warwak weche midwaro puonjwa.—Ezra 7:10.
8 Wabiro tieko chokruogwa ma kawuono gi wer manyien ma wiye wacho ni, “Pinyruoth Osechako Locho—Wakwayo ni Mondo Obi!” Wendni, ma nyocha ower e romo mowach e paragraf mokwongo, ne olos ahinya-ahinya mondo oparnwa ni higni 100 koro osekalo nyaka Pinyruoth ne chak locho.
9 Kuom adier, wende manyien-go gin “gik mabeyo” mowuok kuom Jehova. (Math. 12:35a) Omiyo, wang’aduru ni wabiro puonjore wende manyien-go kendo wabiro werogi gi chunywa duto ka wamiyo Jehova Nyasachwa pak gi duong’ ma owinjore yudo!—Zab. 147:1.