Watimuru Kinda e Loko Ji Obed Jopuonjre
1. Ang’o ma dwarore ni watim mondo ji oyud warruok?
1 Ripot mar tijwa ma higa 2014 nyiso maler kinda ma jotich Nyasaye timo e tij lando wach maber mar Pinyruoth. (Mat. 24:14) Moloyo kinde moro amora mosekalo, sani e ka walando ne ji mang’eny wach maber manie Muma kokalo kuom lendo mar ot ka ot, kampen makende mag pogo trakt kod kalatese mag gwelo ji, kaachiel gi lendo kuonde ma ji ng’enyie. Kata kamano, mondo joma walendonegi oyud warruok, dwarore ni wapuonjre kodgi Muma mondo gibed jopuonjre mag Yesu.—1 Tim. 2:4.
2. Penjo mage ma nyalo konyowa bedo jokinda e chako puonjruok mar Muma gi ji?
2 Tim Kinda e Chako Puonjruok mar Muma gi Ji: Sama ilendo ne ng’ato morwako wach, be itemoga matek mondo ichan kaka unyalo romo kendo, kae to idok mapiyo kaka nyalore mondo ichak puonjruok mar Muma kode? Karang’o mogik ma ne ichako puonjruok mar Muma gi ji achiel kachiel e limbe mokwongo? Be isetemo chako puonjruok mar Muma gi joma iteronegiga gasede manyien? Be isetugo ne joskul weteni, jotich weteni, jirendeni, wedeni, kod jomamoko vidio mar Ang’o Momiyo Onego Ipuonjri Muma? kata mar Ni Nini Hutendeka Kwenye Funzo la Biblia? Sama ilendo gi mesa kata troli, be inyisoga joma okawo buk mwatiyogago e puonjo ji Muma chenro mar puonjruok Muma ma onge chudo?
3. En ang’o ma dwarore mondo okonywa puonjo adiera e yo makare?
3 Yore ma Jehova gi Yesu Konyowae: Wach ma Yesu notiyogo ni “dhiuru” ka nochiko jopuonjrene ni ‘gilok ji obed jopuonjre,’ nyiso ni dwarore ni wabed jokinda sama wamanyo ji. Yesu bende nosingo ni nodhi bedo kodwa. (Mat. 28:19, 20) E wi mano, Jehova osemiyowa rohone maler, buge mwanyalo tiyogo e lendo, kendo osetiegowa mondo wabed joma olony e puonjo ji adiera. (Zek. 4:6; 2 Kor. 4:7) Wanyalo kwayo Nyasaye mondo omiwa “teko kod gombo” mar tiyo tich makendeni.—Fil. 2:13.
4. Ang’o momiyo onego watim kinda e loko ji obed jopuonjre?
4 Wayudo mor mogundho sama walando wach maber. Kata kamano, wabedo mamor moloyo sama wapuonjo ng’ato adiera, kendo konye mondo owuoth kodwa e ‘ndara ma tero ji e ngima.’ (Mat. 7:14; 1 The. 2:19, 20) To maduong’ie moloyo, sama watimo kinda duto mondo walok ji obed jopuonjre, wamiyo chuny Jehova bedo mamor, “nikech ok odwar ni oketh ng’ato ang’ata, to odwaro ni ji duto ochop kama gilokoe chunygi gia e richo.”—2 Pet. 3:9.