Wechegi Onego Obed e Chunyi

Inyalo pim jonyuol gi jokwath. Nyaka girit nyithindgi e yo maber, nikech yot mondo nyithindo oba yo, kendo mano nyalo kelo ne nyithindgi hinyruok. (Nge. 27:23) Jonyuol nyalo konyogi nade? Nyaka gimany thuolo mar wuoyo kod nyithindgi odiechieng’ kodiechieng’, mondo ging’e gima nie pachgi kod chunygi. (Nge. 20:5) Bende, jonyuol nyaka ged gi gik ma ok nyal mako mach mondo giteg yie mar nyithindgi. (1 Kor. 3:10-15) Vidio miluongo ni Wechegi Onego Obed e Chunyi nyiso gimomiyo joot onego otim lamo mar joot ma ok gibare. Kuom mano, neuru kanyachiel kaka joot, kae to uwuo kuom penjo ma luwogi.

(1) Ang’o ma ne oduoko chien kinda ma jood Roman ne nigo e weche Nyasaye? (2) Ang’o momiyo lamo mar joot ma Owadwa Roman ne ochako tayo e kar chakruok ne ok odhi maber? (3) En yo mane ma Ndiko chiwo ma ka oluw to nyalo konyo e pidho nyithindo e yo maber? (Rapar 6:6, 7) (4) Ang’o ma nyalo konyo joot mondo giwuo maber e kindgi? (5) Chiwruok kaka mage ma dwarore ni jonyuol otim mondo gikony nyithindgi? (6) Ere kaka Owadwa Martin gi jaode nokonyo jood Roman bedo gi paro mowinjore? (Nge. 27:17) (7) Wiye udi onego otim ikruok mage motelo mondo lamo mar joutegi odhi maber? (8) Ang’o ma Owadwa Roman nochako timo mondo okony joode? (9) Ang’o momiyo joot onego otim lamo mar joot ma ok gibare? (Efe. 6:4) (10) Gin paro mage mochiw ma nyalo konyo ahinya e timo lamo mar joot? (11) Ere kaka Owadwa Roman ne ok omwomore ka ne okonyo wuode ma Mark neno gimomiyo onego otim gik moko e yo makare? (Yer. 17:9) (12) Ere kaka Owadwa Roman gi jaode nokonyo nyargi ma Rebeka mondo otim yiero maber kodok korka chako osiep gi wuowi miluongo ni Justin? (Mari. 12:30; 2 Tim. 2:22) (13) Owadwa Roman gi jaode nonyiso nade ni gin gi yie kuom Nyasaye ka ne gitimo lokruok ma ne dwarore e ngimagi? (Mat. 6:33) (14) Ere kaka vidioni jiwo gimomiyo dwarore ahinya mondo wiye udi ota joutegi e weche Nyasaye? (1 Tim. 5:8) (15) Kapo ni in wi ot, ang’o ma ing’ado e chunyi ni ibiro timo?

NE WIYE UDI: Ma ne en drama ma ne otim e chokruok maduong’ mar ndalo adek ma higa 2011. Ka ne ineno dramano, be ne ifwenyo kuonde ma ne dwarore ni itimie lokruok moko e lamo mar joodi? To dibed ni pod nitie kuonde ma inyalo timoe lokruok moko? Kapo ni en kamano, kwa Jehova e lamo mondo okonyi timogi, nimar mano biro kelo mor ma nyaka chieng’ ne joodi.—Efe. 5:15-17.