Luw Puonj Makare mag Jehova

Jehova ema keto ne dhano chike makare monego giluw. Kuom ranyisi, ne oketo ni kend onego obed riwruok mosiko e kind dichwo gi dhako. (Mat 19:4-6, 9) Okwedo timbe duto mag terruok. (1Ko 6:9, 10) Ne ochiwo puonj manyiso kaka jotichne onego orwakre mondo gibed mopogore gi jomamoko.—Rap 22:5; 1Ti 2:9, 10.

E piny masani, ji mang’eny tamore luwo chike makare mag Jehova. (Rum 1:18-32) Ginyalo chako rwakore, bidhore, kendo timo gik moko mana nikech ji mang’eny ohero timo kamano. Ji mang’eny pakorega nikech gik maricho ma gitimo kendo giwuoyoga marach e wi joma timo timbe mabeyo.—1Pe 4:3, 4.

Kaka Joneno mag Jehova, nyaka wamak chike Jehova ka wan gi chir. (Rum 12:9) E yo mane? Dwarore ni wati gi rieko e nyiso ji dwach Nyasaye. Kata kamano, wan wawegi nyaka wasik ka wan gi timbe mabeyo. Kuom ranyisi, sama wadwaro yiero lewni ma warwako, wanyalo penjore kama: ‘Be yo ma arwakrago kendo abidhorago nyiso ni amako chike Jehova koso ginyiso chuny mar pinyni? Be lewni ma arwako nyiso ni an Jakristo moluoro Nyasaye?’ Kata sama wayiero neno program kata sinema moro, wanyalo penjore niya: ‘Be Nyasaye biro yie gi programni? Programni jiwo puonj kod chike mag ng’a? Be yiero ma atimo e weche mag manyo mor nyalo miyo kik amakra gi timbe mabeyo? (Za 101:3) Be onyalo chwanyo joodwa kata jomoko?’—1Ko 10:31-33.

Ang’o momiyo ber ka waluwo puonj makare mag Jehova? Yesu Kristo chiegni ketho joma richo kendo tieko richo duto. (Eze 9:4-7) Mana joma timo dwach Nyasaye kende ema biro dong’. (1Jo 2:15-17) Wadhiuru nyime riwo lwedo puonj makare mag Jehova mondo joma neno timbewa mabeyo opak Nyasaye.—1Pe 2:11, 12.

NE VIDIO MA WIYE WACHO NI UWE RAFIKI YA YEHOVA—MWANAMUME MMOJA, MWANAMKE MMOJA KAE TO UNON PENJO MALUWOGI:

• Ang’o momiyo owinjore wadag kaluwore gi puonj makare mag Jehova?

• Ang’o momiyo jonyuol onego ochak puonjo nyithindgi chike makare mag Jehova sama pod gitindo?

• Ere kaka joma tindo gi joma dongo nyalo konyo ji mondo one ber mar Nyasaye?