Kampen Makende mar Chako Puonjruok Muma gi Ji e Dwe mar Septemba

E dwe mar Septemba, wabiro timo kinda mar chako puonjruok Muma gi ji mathoth kaka nyalore ka watiyo gi brosua mar Inyalo Dak gi Mor Nyaka Chieng’! Jolendo nyalo yiero bedo jopainia makonyo kuom seche 30. Ere kaka wabiro timo kampen makendeni?

• E Limbe Mokwongo: Ti gi weche manie tok brosua e chako wuoyo gi ji kendo inyisgi kaka wapuonjoga ji Muma. Par joma ne oyie winjo wach ka ne ilendonegi moriwo nyaka joma idokga limo. Kata ka bed ni ne gitamore puonjore kinde mokalo, samoro ginyalo mor gi yo manyien ma wapuonjogo ji Muma kod brosua manyienni. Ok onego wawe brosua e ute ma ji ongee kata ore ne joma pok oyie puonjore Muma. Komiti Matayo Tije Kanyakla nyalo chano romo momedore mag dhi lendo e dwe mar kampen.

• Thuolo Mamoko: Ka kanyaklau tiyo gi troli e tij lendo, unyalo keto brosua mar Inyalo Dak gi Mor Nyaka Chieng’! e troli kanyo. Nyis joma okaw brosuano ni inyalo puonjgi Muma ma onge chudo. Nyisgi kaka watiyo gi brosuano e puonjo ji Muma kitimo kamano e yo machuok, kata inyalo chano timo kamano bang’e. Jarit tij lendo nyalo chano mondo jolendo molony odhi ochak puonjruok Muma gi ji kuonde ohala ka gitiyo gi brosuano. Inyalo chako puonjruok Muma gi joma utiyogo kata gi joma ilendonegi sama in e dijeni.

Yesu nochikowa ni wadhi ‘walok ji obed jopuonjrene ka wapuonjogi.’ (Mat 28:19, 20) Wageno ni kampen makendeni biro konyowa chopo tijno ka watiyo gi Inyalo Dak gi Mor Nyaka Chieng’!