Ji Duto Gombo ni Gidag Maber e Kinde Mabiro
Diher ni idag e ngima ma chalo nade e kinde mabiro? Mana kaka ji mang’eny, nyaka bed ni in bende diher ni idag maber kaachiel gi joodi e kinde mabiro, tiende ni, idag e ngima mopong’ gi mor, ma onge tuoche, ma nigi kuwe, kendo ma gik moko duto dhiye maber.
Kata kamano, ji mang’eny nigi kiawa ka be ginyalo dak e ngima ma chalo kamano e kinde mabiro. Gisebedo ka gineno kaka gik ma timore apoya—kuom ranyisi, tuo mar korona—oseketho ngima ji, okelo dhier, kendo onego ji mang’eny. Kuom mano, gineno ni ok ginyal dak maber e kinde mabiro.
Nikech kiawa ma ji nigo e wi kinde mabiro, gitemoga manyo yore mopogore opogore ma nyalo konyogi dak maber. Jomoko keto genogi kuom teko ma ok ne ma giparo ni chiko ngimagi mondo gibed gi ngima maber kata gibed johawi. Ji mang’eny to paro ni somo mang’eny kod mwandu e ma nyalo konyogi yudo gik ma gidwaro. Jomoko bende paro ni bedo ng’ama ber oromo aroma.
Be iparo ni yorego nyalo miyo idag maber e kinde mabiro? Mondo iyud dwoko, non ane penjo ma luwogi:
Ang’o ma nyalo konyi ng’eyo kaka ngimani biro chalo e kinde mabiro?
Be somo kod pesa nyalo miyo idag maber e kinde mabiro?
Be bedo ng’ama ber biro miyo idag maber e kinde mabiro?
Be nitie gima nyalo konyi ng’eyo kaka inyalo dak maber e kinde mabiro?
Gasedni chiwo dwoko mag penjogo.